Mga juice makapaalibyo (1)

Ngano nga ang duga (juice) nga gikan sa mga prutas, makapaalibyo man sa konstipasyon. Kini tungod kay dasok kini sa fiber, minerales, ug mga bitamina.

Apan dili usab kita makapatuyang niini, sanglit kay duna kini tukmang sukod sa angay’ng imnon.

Sama pananglitan nga sa 1 ka adlaw, 1 ka tasa la’y imnon niini sa dili pa mokaon sa pamahaw. Ayaw na dugangi’g asukar, ug dili sab kanang mga ‘juice’ nga girepake o gibotelya, nga sagad gipamaligya sa grocery o sa supermarket.  Aron pagseguro nga puro o natural nga duga kini gikan sa prutas, mas maayo nga kita na ang magpreparar sa balay, total kadiyot ra ni nato andamon.

* Prune juice — para sa konstipasyon, kini ang sagol nga 5-6 ka buok prunes, ½ ka kutsarita sa honey, ½ cumin powder, ug 1 ka tasa nga tubig init. Unsaon ni paghimo? Ihumol sa init tubig ang prunes sa tasa sulod sa 5 minutos, kon mahumok na, kuhaan sa panit ang prunes. Ibutang sa blender ang prunes ug igong tubig, unya idugang ang honey ug cumin powder. Paandaron ang blender. Iniighuman, ihuwad sa baso, dayon imnon.

Sulaye ni kay ang prunes nagbaton ni og ‘dietary fiber’ ug sorbitol, nga makapasayon sa pagpagawas sa hugaw. Ang honey, natural antibakteryal ug antioxidant nga makatabang nga igawas ang toksins. Ang cumin, makamentin sa kahimsog sa ginhawaan ug padugang sa kalami o timplada sa juice.

* Pear juice — para sa konstipasyon, kini ang ingrediyentes nga, 2 ka buok pear nga kuhaan sa lagnot (pith), 2 ka kutsara’ng limes, pudyot sa ‘blacksalt o seasalt. Unsaon ni paghimo? Tadtaron ang pears, inighuman, ibutang sa blender ug paandaron. Dayon ihuwad sa baso, butanga’g lime juice ug pudyot sa asin, kutawon ug imnon.