Biyahe paingon sa Siquijor

Human sa subra tulo ka dekada, nahibalik na gayud ako sa silingan nga isla sa Siquijor, ang lalawigan diin gikan ang pamilya sa akong amahan. Didto siya natawo sa lungsod sa Lazi sa wala pa mobuto ang ikaduha nga gubat sa kalibutan.

Wala na ako mahinumdom sa akong pagbisita sa maong probinsiya kaniadto. Ug sa nagdagan nga mga panahon, maoy akong handom nga makabalik sa maong probinsiya. Kini aron usab nga mahimamat nako ang akong kaparyentehan didto.

Ug natuman kini sa dihang nakadesider ako ug pipila ka kauban sa buhat ug uban nga mga barkada pagduaw sa maong dapit. Gani, subra sa usa ka tuig kadto nga plano ug sa niagi lang nga semana natuman gumikan lagi sa ka busy sa grupo.

Dili sama kaniadto, sayon, dali ug hamugaway na ang pagbiyahe paingon sa Siquijor karong panahona. Kini tungod sa ka daghan na’ng barko nga molawig matag adlaw gikan sa Sugbo ug ubang lugar paingon ngadto sa maong lalawigan.

Kon manukad ka sa Sugbo, adunay mga fastcraft nga gikan sa pier paingon sa Siquijor. Apan mahimo usab ka nga moeskala ngadto sa siyudad sa Dumaguete o sa dakbayan sa Tagbilaran. Adunay biyahe usab sa barge paingon ngadto sa Siquijor gikan sa lungsod sa Santander.

Tungod niini, dako na ang kalamboan sa Siquijor niining panahona, ilabi na sa natad sa turismo. Sa among pagtadlas sa unom ka lungsod sa maong lalawigan, hilabihan ka daghan sa mga langyaw nga turista ang among nasugatan.

Sa mga beach resort didto, nagkatag ang mga Intsik, Koreano ug mga turista gikan sa Estados Unidos ug uban pa’ng mga nasud. Gani akong personal nga nakaestorya ang pipila ka turista gikan sa France, Russia, Germany ug Italy sa usa sa mga beach didto.

Usa sa giganahan sa mga langyaw’ng turista sa dihang ako silang gipangutana mao ang kanindot ug ang kasimple sa lugar. Angay lang nga mamintenar kini sa kagamhanan sa maong probinsiya aron nga mas molambo pa ang industriya sa turismo didto sa Siquijor.