Magtigum nga palambuon

Hurot ang akong bilib sa usa nako ka higala nga sekreto kaayo, ug salabtunon ang iyang yano nga pinahiyoman. Kon imo ni siya nga ikabagat ug mag-estoryahanay sa kinabuhi, wa g’yuy timik nga pwerte kahilumon nga mura’g hadlok nga makapasilo og kabubut-on sa isigkaingon. Istrikto ang dagway ug sa pagdumala sa pamilya, apan hilabihan ka mapainubsanon sa kahigalaan.

Sa didto pa kini nagtrabaho sa abroad, ang asawa kanunay masagmuyo kaylagi kuno kulang pirme ang ipadala nga panggasto sa pamilya. Moingon lang nga ipadaginot nga masapar, unsaon duna man sab kuno siya’y obligasyon nga personal, apan pasangil lang kadto aron sa pagdisiplina.

Sa iyang pagpauli sa Pilipinas, wala ko makamatikod nga dugay na diay nahiuli, unsaon nagmingaw ug wa’y kisaw ang pag-abot niya, nga mura lang wa’y nahitabo. Sukad niadto, giayum-ayom ang balay, gihimoan og lugar nga katindahan og ginagmay lang, nga siya g’yud ang nangunay sa pagpaninda ug mangompra aron kuno dili mabangkarota. Sulod sa dugay nga panahon, naluoy ko nga naniid niya, kay ambot og makasustenir ba ang iyang gamay nga tinda-tinda.

Karong bag-ohay lang, nabulgar g’yud ang sekreto niya, kay nanuybo sa balay niya ang mga kabilya nga tukoran og upat ka andana nga bilding, aron himuon nga ‘boarding house’. Diay duna siya’y wa hilabti nga tinigum sa nag-abroad pa siya.

Iya kini nga gipalambo pinaagi sa mga investments sa bangko ug sa ubang negosyo.

Karon nagpasalamat nga nakapasar sa pagsulay nga ang pagtigum, kon buot moasenso ayaw ni gamita sa kompromiso, kay mahurot nga magkahilis ni, ilabi na kon kini patan-ugon nga dili palambuon, kay sigehan lang og kuot aron gastohon.