Sugyot kabahin sa BRT

Walay hunong ang panaglantugi nila ni Mayor Tomas Osmeña ug Presidential Assistant for Visayas Michael Lloyd Dino kabahin sa isyu kon makasulbad ba, o dili, sa problema sa trapiko ang pagpatuman sa Bus Rapid Transit (BRT) dinhi sa dakbayan. Wala g’yud motuo si Dino nga ang BRT makasulbad sa grabeng kahuot sa mga sakyanan diha sa kadalanan. Nagtuo si Dino nga ang pagpatuman sa BRT makapasamot pa sa problema sa trapiko tungod kuno sa kagagmay sa karsada nga agian sa BRT.

Apan si Mayor Osmeña nga miendorso g’yud sa katukoran sa BRT dinhi sa dakbayan sa Sugbo, nagtuo sab nga makatabang pagpahapsay sa trapiko ang pagpadagan og mga bus diha sa mga pinili nga karsada.

Tungod niining nagkasumpaki nga baruganan nila ni Mayor Osmeña ug ni Dino, nga miendorso usab sa Light Rail Transit (LRT) nga mao kuno ang epektibo nga sulbad sa problema sa trapiko sa Metro Cebu, nanghagit og public debate si Osmeña.

Apan mura og walay debate nga mapahigayon kay ang presidential assistant for Visayas dili ganahan nga makigdebate sa mayor.

* * *

Buyno, duna ko’y sugyot, kana kon paminawon nila ni Mayor Osmeña ug ni Dino, ingon man sa mga tinugyanan sa Department of Transportation (DOTr). Dili ba maayo nga pagka karon pa lang, mohimo ta og “dry run” pinaagi sa pagpadagan og mga bus diha sa mga karsada nga gitagana na isip BRT exclusive lanes.

Ang buhaton nato, makigsabot ta og kompaniya sa bus, pananglit ang Ceres Lines, ug sulod sa usa ka semana, atong kuhaan og special permit nga anhi sila mamasahero sa rota sa BRT nga gikan sa Bulacao, subay sa Natalio Bacalso Avenue, P. del Rosario, Osmeña Boulevard paingon sa Kapitolyo, dayon Escario, unya subay sa Archbishop Reyes Avenue ug Gov. Mariano Cuenco Avenue ngadto na sa Talamban.

Ang duha ka “lane” sa taliwala sa karsada, dili g’yud paagian og ubang sakyanan, unya ang mga PUJ nga nagbiyahe niining maong mga karsada nga agian sa BRT, dili na paagion. Pinaagi niini, masuta nato kon unsa ang epekto sa pagpatuman og BRT.

Kon makita nato nga epektibo kini nga paagi pagsulbad sa trapiko, nganong ato man nga supakon? Apan kon makita nato nga makapasamot hinoon kini sa problema sa trapiko, sigun sa pagtuo ni Dino, aw mas maayong unahon usa nato ang pagpalapad sa karsada.

Pagka karon, kapin sa P5 Bilyones ang gitagana gikan sa P16 Bilyones nga BRT budget, aron nga gastohon sa pagbayad sa mga yuta nga maigo sa pagpalapad sa karsada.