Radio drama ug uban pa

Natahasan kong mopaambit kun unsaon pagsuwat og script alang sa Religious Radio Drama sa gipahigayong Third National Media Convention of the Philippines diin kita ang nahimong host dinhi sa Sugbo. Gamhanan gihapon ang radyo sanglit di man tanang tawo ang dunay kahigayonan nga makapalit og mantalaan o nakahupot og telebisyon. Ang sa kabukiran ang padayon gihapong magsalig sa ilang mga transistor radio alang sa balita ug serbisyo publiko. Sa wala pa ako moadto sa Betania Retreat House pipila sa akong mga higalang batan-ong babaye ang kanako nakigkita. May buot silang ipaambit kalabot sa drama sa ilang kinabuhi. Nindot ang among panagsultihanay ug daghan kaayo kong nakat-onan gikan nila. Nakaingon ko nga ang kinabuhi sa tawo kinabuhi sa sugilanon ug matag sugilanon ang makatandog gyud sa atong imahinasyon.