Barangay election 2019

Ang House of Representatives Suffrage and Electoral Reforms Committee mitugot sa pag-uswag sa 2017 Barangay ug Sangguniang Kabataan elections ngadto na sa ikaduhang Lunes sa buwan sa Mayo 2018. Kini aron idungan sa plebisito sa pag-usab sa batakang balaod ug sa Bangsamoro Basic Law (BBL). Gitugotan usab sa nahisgotang komitiba ang pagpabilin sa mga pinili nga opisyal sa barangay.

Sa miaging adlaw’ng Lunes, 19 sa mga sakop sa komitiba ang mipabor sa pag-uktaba sa piniliay unya sa Mayo 2018, ug duha lang ka sakop niini ang misupak ug kini mao ang mga representante sa Alliance of Concerned Teachers.

Ang Suffrage and Electoral Reforms Committee gipaabot nga mosumiter sa ilang report ngadto sa kinatibuk-ang sakop sa ubos balay balaoranan aron ilang hukman ang pag-uswag sa piniliay.

Agi og reaksyon, mas pabor si Gobernador Hilario Davide III sa pag-uktaba sa barangay ug SK elections unya na sa mid-term election sa tuig 2019 imbes kay sa sunod tuig 2018 kay mas makadaginot ang gobiyerno sa iyang gastuhon sa eleksiyon.

Sa akong tan-aw, “good as approve” na ang report sa komitiba tungod kay sa caucus sa mga sakop sa ubos balay balaoranan, 200 kanila ang mipabor sa pag-uswag sa piniliay unya sa Mayo 2018.

Hinuon, wa pa ta masayod unsa ang hukom sa mga sakop sa senado mahitungod sa pag-uswag sa eleksiyon sa barangay. Pero una na nga gipamahayag sa mga magbabalaod nga dili problema sa senado ang pag-uktaba sa piniliay.

Kon mao kini ang dagan, segurado na ang pag-uswag sa barangay elections. Pabor ko sa sugyot sa gobernador nga sa tuig 2019 na lang ang barangay ug SK elections aron makadaginot ang gobiyerno.

Sa akong tan-aw, wa’y kaseguroan nga may mahitabong Charter Change para sa pederalismo tungod kay wala pa kini makapanukad. Ang BBL kaha hinuon, pero duda gihapon ko nga dili madayon ang plebisito niini.