Drugas agi sa Customs

Dakong hagit ang giatubang karon ni Mayor Tomas Osmeña ug sa mga proponent sa Bus Rapid Transit (BRT) project sa siyudad sa Sugbo ang pagtubag sa pangutana sa mga netizens kon ang hapit P6 bilyones nga dugang pundo nga giaprobahan sa NEDA-ICC gamiton ba sa pagpalapad sa kadalanan nga kaagian sa BRT.

Gibalikbalik na og pangutana sa mga netizens sa Facebook kon palapdan ba g’yud ang mga karsada aron dili masinati ang kahuot sa trapiko diha sa mga karsada nga tagduha lang ka “lanes” matag direksiyon, ug ang usa sirad-an aron himuong BRT exclusive lane.

Sa mga balita, giangkon ni Atty. Rafael Yap nga ang hapit P6 bilyones nga dugang pundo sa BRT project, gamiton pagpalapad sa karsada nga butangan og stations, terminals, ug depot. Nganong dili man direkta nga makatubag niini ang mayor, si Yap ug si City Administrator Nigel Paul Villarete? Tungod ba kay wala g’yuy road widening nga pagahimoon sa mga karsada nga agian sa BRT?

Para nako, kon bus system man lang ang mass transport nga nahunahunaan alang sa siyudad sa Sugbo, nganong dili man lang padaganan og mga bus sa Ceres, KMK, ug uban pa’ng mga bus company ang Bulacao paingon sa Capitol ngadto sa Ayala lahos na sa Talamban?

Ngano nga magkinahanglan pa man og P16 bilyones kon bus transport ra man diay ang ibutang? Ako’y gikuyawan sa kadako niining maong pundo. Wala ba kaha tuyoa kining proyektoha aron adunay “election fund” sa 2019?

* * *

Angayan na nga mo-resign sa katungdanan si Customs Commissioner Nicanor Faeldon, taliwala sa nagkaklaro nga tulobagon niya ug sa mga kaubang Magdalo nga anaa karon sa Bureau of Customs, taliwala sa nadiskubreng P6 bilyones nga shabu shipment nga nakaplagan sa usa ka bodega sa siyudad sa Valenzuela.

Mas makauulaw kon ang presidente na mismo ang motaktak ni Faeldon. Maayong timan-an sa Customs commissioner nga ang pakiggubat batok drugas maoy prayoridad ni Presidente Duterte. Busa, ang pag-smuggle sa daghang shabu agi sa BOC Manila, usa ka dakong sagpa sa presidente.

Taliwala sa imbestigasyon sa Kongreso sa maong shabu shipment, mitumaw ang ngalan ni Kenneth Dong, ang Insik nga tag-iya sa dakong imnanan sa Mandaue, nga giingong apil sa transaksiyon nianang P6 bilyones nga shabu nga nakalusot sa Customs.

Kon mao, wala ba kaha’y mga taga-Customs sa Cebu nga nag-apil-apil niining binuanga?

Pagtumaw ning balitaa, nahinumdom ko sa daghang shipment sa pseudoepidrine niadtong 2004. Ang Cebu ra ba gihulagway ni Duterte nga “hub” sa shabu sa Kabisay-an.

Asa man gikan ang suplay sa shabu, sa Mindanao? Sa Bilibid? O direktang gi-smuggle gikan sa China? Kining mga binuanga ra ba, migrabe sa dihang nanghawod pa ang mga “yellow.”