Pagpili sa kausaban
May dinalian ko nga lakaw gahapon mao nga wa ko katiwas sa pagdumala sa Arangkada sa DYAB Abante Pa, Bisaya!
Naghunahuna na daan unsa’y akong kapilian aron mas dali nga makaabot sa akong destinasyon. Maayo na lang nga duol ra ang akong adtoan sa tuyo sa akong asawa mao nga nikuyog na lang ko sa iyang sakyanan.
Naatol sab nga managsama ang oras sa among pagpauli mao nga nagkasabot nga magkuyog lang gihapon sa biyahe gikan sa siyudad. Labihan nakong suwerteha kay naluwas sa pagkatanggong, kay gahapon ang unang adlaw sa pagkasuspenso sa operasyon sa Uber.
* * *
Dihang gipahibawo sa Land Transportation Franchising and Regulatory Board (LTFRB) ang usa ka buwan nga suspenso sa Uber, namalandong ko kon unsaon nila sa pagpatuman.
Gihatagan nila og kopya sa kamandoan ang tanang ahensiya sa gobiyerno ug kapolisan. Pagseguro tingali nga mas daghan ang magbantay sa kadalanan.
Apan mas sayon ang pagmando sa Uber pagtak-op sa ilang sistema, kay ang tanan nilang pasahero ug mga drayber magkaabot ra man online. Kon tak-opan ang ilang sistema, wa na’y pasahero nga maka-book og sakyanan ug wa na sa’y drayber nga makapamasahero.
* * *
Tuod man, gipili sa LTFRB ang mas sayon ug mas epektibong paagi. O tingali boluntaryo lang nga nitak-op sa ilang sistema ang Uber aron nga dili na modako ang ilang atraso samtang maningkamot ang mga tagdumala sa paglibkas gilayon sa pagkasuspenso o pag-iban sa gitas-on sa silot.
Kon basehan ang kasibaw sa reklamo sa mga pasahero, nga naanad na sa kasayon sa Uber, ug simpatiya sa inilang mga politiko, nga nakumbinser sa popularidad sa bag-ong teknolohiya, mahimong magpaabot lang ang Uber nga mamilok ang LTFRB.
* * *
Ang labing gamhanan nga puwersa sa kalibutan mao ang ideya kansang panahon niabot na. Ang panahon sa bag-ong sistema sa transportasyon nga girepresentahan sa Uber, Grab ug susamang mga kompaniya niabot na. Wa na’y makapugong sa kausaban.
Ang LTFRB ug ubang puwersa sa dunot ug karaang sistema mahimong mosuway sa pagbaraw. Bisan kon ilang pagpahamtang og prangkisa napakyas paghimo sa mga sakyanang pamasahero nga mas luwas, paspas ug makiangayon.
Apan ang katawhan nakapili na sa kabag-ohan, ug angay’ng mopadaplin ang mga nahimutang sa sayop nga bahin sa kasaysayan.
- Latest
