EDITORYAL - Palpak ang BIR

Palpak g’yud ang kagamhanan paggukod sa mga tawo nga nakaangkon og dagkong katigayonan gikan sa ilegal nga paagi. Ang Bureau of Internal Revenue (BIR) gitahasan g’yud unta sa paghimo niining maong trabaho, apan kuwang sila sa kampanya. Makita nimo kini diha nga ang hukmanan na maoy miisyu og Provisional Asset Preservation Order (PAPO) ngadto sa katigayonan sa miangkong druglord nga si Franz Sabalones.

Ang pag-isyu sa hukmanan og PAPO ngadto kang Sabalones gibase sa petisyon nga gipasaka sa kadagkoan sa Philippine Drug Enforcement Agency (PDEA) nga gipangulohan ni Regional Director Yogi Felimon Ruiz, human nga giangkon ni Sabalones nga nalambigit siya pagpamaligya og shabu dinhi sa Sugbo. Dagko kaayo ang kitaon sa pagpamaligya og drugas mao nga ang mga druglord takulahaw lang nga mahimong milyonaryo.

Dinhi unta nga bahina nga molihok ang kadagkoan sa BIR pinaagi sa paghimo’g lakang aron masubay ang gigikanan sa katigayonan sa mao nga mga tawo. Didto sa Estados Unidos, dunay pangulo sa mga gangster nga si Alphonse Gabriel Capone nga wala gayud mabilanggo bisan og nalambigit og daghang krimen, kay maayo kaayo siya molingkawas sa mga kaso. Apan wala makalingkawas si Al Capone tungod kay gisubay sa kagamhanan kon diin gikan ang iyang katigayonan.

Kini unta maoy kuhaan og pagtulon-an sa kadagkoan sa BIR aron gukdon nila ang mga tawo nga mikalit lang sa pagkadato tungod sa ilang pagkalambigit sa mga ilegal nga binuhatan. Kon wala pa himoi og petisyon sa PDEA aron sakmiton ang katigayonan ni Sabalones, dili maaksyonan ang mga ilegal niyang kabtangan. Apan dili pa ulahi ang tanan alang sa BIR, mahimo pa sila nga mag-inabtik sa paggukod sa mga tawo nga daghan og katigayonan nga nakuha gikan sa ilegal.

Si Sabalones traffic enforcer lang kaniadto sa dakbayan sa Sugbo apan diha nga nahimong druglord, nakaangkon na siya og minilyon ka pesos nga katigayonan.