Surender na si Digong

Sa iyang pagpapili pagka presidente sa nasud, gisaad ni Rodrigo Duterte nga iyang sumpuon ang suliran sa gidili nga drugas ug kurapsyon sulod lang sa duha ngadto sa tulo ka buwan.

Mao nga sa iyang pagdaog pagka presidente, bisan wala pa siya makapanumpa ug makalingkod sa Malakanyang, gisugdan na dayon sa kapolisan ug uban nga law enforcement agencies ang subsob nga kampanya batok sa gidili nga drugas.

Apan pag-abot sa duha ka buwan human molingkod si Duterte sa Malakanyang, wala masumpo ang suliran. Kini ang hinungdan nga nangayo siya og lugway nga unom ka buwan.

Pag-abot sa unom ka buwan, wala gihapon masumpo ang suliran sa gidili nga drugas. Tungod niini, nangayo na usab si Duterte og lugway nga usa ka tuig. Apan pag- abot sa usa ka tuig, wala gihapon masulbad ang suliran.

Kaniadtong Biyernes, giangkon ni Duterte atubangan sa mga nanambong sa kalihokan sa Southern Philippines Medical Center sa Davao City nga dili na mapugngan ang suliran sa gidili nga drugas dinhi sa nasud.

Ang iyang rason, ang nasud gilangkoban og 7,107 ka isla nga lisud bantayan tungod sa kataas sa iyang kabaybayonan mao nga makasulod gayud ang gipalusot nga gidiling drugas. Kuwang ang kahimanan sa pagpugong niini. Ang Amerika gani wala man makasulbad sa iya usab nga suliran sa gidili nga drugas.

Ang pamahayag ni Duterte timailhan ba kini sa iya na nga pagsurender sa sindikato sa gidili nga drugas? Sa duwa pa nga boksing, giitsa na ba sa presidente ang puti nga tualya timailhan sa iyang kapildehan sa organisadong sindikato sa gidili nga drugas?

Sabton nako nga ang maong pamahayag sa presidente pagdasig ug pagpalig-on pa sa kampanya sa iyang kagamhanan batok sa suliran sa gidili nga drugas.