Banat ( Leaderboard Top ), pagematch: 1, sectionmatch: 1

Benepisyo sa tigulang

Niadtong nakalabay nga semana, na-confine sa usa ka private hospital ang akong inahan gumikan kay aduna kini pneumonia ug naglisod g’yud sa iyang pagginhawa.

Taud-taod na siya nga adunay gihambin nga balatian, ug sige na g’yud og kalandig sa tambalanan tungod sa iyang pangedaron nga 82-anyos na.

Akong masabtan nga nabalaka siya sa bayranan sa tambalanan, ug labaw na sa gastohan sa mahal nga mga tambal.

Hinoon, napangitaan ra man og pamaagi nga makabayad ra pud sa obligasyon sa hospital.

Sa upat ka adlaw niya sa tambalanan, ni-bill g’yud kini og P30 mil.

Sakit sa bulsa, apan maayo na lang kay adunay prebelihiyo alang sa mga senior citizen, diin naka-avail siya ug 20 porsiyento nga diskwento sa iyang bayrunon.

Gawas niini, tungod kay automatic member man sa PhilHealth ang mga senior citizen, namenosan pa g’yud ang among nabayran sa paggawas sa hospital.

Dihang nagpalit ko og tambal sa usa ka pharmacy, dala ang senior citizen ID, booklet ug resita, wala man mohatag ang sales clerk og discount kay kinahanglan kuno ang authorization letter sa akong inahan.

Wala na lang ko makiglantugi kay dili man sab ko segurado kon naa o wala kini sa probisyon sa balaod.

Pastilan, kon unconscious o anaa sa Intensive Care Unit (ICU) ang pasyente nga dili makapirma sa authorization, dili g’yud diay maka-avail sa 20 porsiyento nga discount ang usa ka senior citizen?

  • Follow Us: