Banat ( Leaderboard Top ), pagematch: 1, sectionmatch: 1

EDITORYAL - Pag-Angkon ni Duterte

Si Presidente Rodrigo Duterte na mismo ang miangkon karon nga dili makontrol ni bisan kinsa ang pagkuyanap niining ilegal nga drugas dinhi sa Pilipinas. Timailhan ba kini nga giisa na niya ang banderang puti sa iyang “war on drugs?” Si Duterte namulong niini atubangan sa mga doctor ug medical professionals didto mismo sa iyang balwarte sa Davao City. Matud ni Duterte nga kon ang Amerika gani nga adunahan, gamhanan ug kompleto sa pundo, wala makapahunong sa ilegal nga drugas sa ilang dapit, ang Pilipinas pa kaha nga gilangkoban og 7,000 ka isla ug adunay kapin 37 mil ka baybayon nga bantayanan?

Kining pamahayag ni Duterte gipagawas niya pipila lang ka adlaw human nga nilutaw ang pangalan sa iyang anak nga si Davao City Vice Mayor Paulo Duterte sa nagpadayong hearing sa Senate Blue Ribbon Committee bahin sa pag-smuggle diha sa Bureau of Customs sa kapin P6 bilyones nga shabu gikan sa China. Nanganti pa si Duterte nga kon adunay mapresentar nga affidavit nga magtumbok g’yud sa iyang anak nga nalambigit kini sa drug smuggling, mokanaog dayon siya sa pwesto.

Makapahibulong kon nganong nakasulti niini ang presidente. Mahimo ba nga isipon nga gikapoy na ang pangulo sa gubat kontra illegal drugs? O pasumbingay ra kini aron ipreparar ang katawhan sa sunod niyang buhaton batok sa problema sa drugas? Sa unang tuig pa lang ni Duterte sa puwesto, ang kampanya batok sa ilegal nga drugas nagpakita na og dakong kausaban ug kalampusan.

Nitahan ang 1.3 milyones nga drug users, nakasakmit ang P18 bilyones nga illegal drugs ug kaliboan ang nangamatay. Nakapamenos usab kini sa mga krimen. Nabalik na usab ang pagsalig sa katawhan ngadto sa mga otoridad bisan pa man og adunay mga operasyon nga kwestiyonable kaayo ang sirkumstansiya sa kamatayon sa mga targets. Kinahanglan nga molihok g’yud ang katilingban batok niining maong problema.

 

  • Follow Us: