Banat ( Leaderboard Top ), pagematch: 1, sectionmatch: 1

EDITORYAL - BRT, LRT dili sulbad sa trapik

Pulos maayo ang tumong sa Bus Rapid Transit (BRT) project ug ang dugay na sab nga gipangandoy nga Light Rail Transit dinhi sa Metro Cebu kay kini makatabang g’yud sa transportasyon sa publiko. Kining duha dili g’yud maoy tubag sa problema sa trapiko. Una, ang BRT anha man magdagan sa naghuot na nga kadalanan, samtang ang LRT, dili man tuod kini magdagan sa mga dalan, apan dako man usab kaayo og gikinahanglan nga pundo aron kini mapatuman.

Kining duha dili solusyon sa kahuot sa trapiko kay ang problema karon resulta sa kakuwang kaniadto og pagtagad sa mga nangaging opisyal. Kon kaniadto nanagana pa unta daan ang mga opisyal, dili unta sila motugot nga makapatuyang pagtukod og mga building nga pidpid na kaayo sa mga karsada. Kadaghanan sa mga dalan karon lisud na kaayong palapdan kon wala’y dakong pundo ang gobiyerno.

Adunay tulo ka dagkong hinungdan sa problema sa trapiko dinhi sa Metro Cebu. Una, grabe kadaghan ang mga sakyanan; ikaduha, gagmay kaayo ang mga dalan; ikatulo, kuwang sa disiplina ang mga drayber. Angay unta nga kini maoy unahon pagsulbad ug mao unta ang gastohan sa pagkakaron. Ang solusyon pagsulbad niining problema sa trapiko sa Metro Cebu mao ang pagpalapad sa tanang mga karsada, pag-estrikto sa implimentasyon sa balaod sa trapiko, apil ang estriktong pagsunod sa proseso sa pagparehistro sa mga sakyanan, sama sa road-life sa mga karaang sakyanan, pag-invest sa modernong traffic lights, pagdugang og tarong nga mga traffic enforcers, ug trainings sa mga drayber ug traffic enforcers.

Ang mga local chief executives isip mga “top managers” sa lokalidad kinahanglan nga mosuporta, responsable ug manubag g’yud alang sa kaayohan sa kinabag-an. Labaw sa tanan, dili sagolan og pamolitika ug kaugalingong interes. Kon kining mao nga mga isyu matubag na, diha pa nga ang BRT ug LRT angay’ng ipatuman.

  • Follow Us: