Banat ( Leaderboard Top ), pagematch: 1, sectionmatch: 1

Ikiha ug dakpon g’yud

Kon dakpon man gani ang mga tawo nga igo lang mokomedya sa pag-ingon nga adunay bomba sa gidala nilang bag panahon nga ang guwardiya mo-inspection kanila sa dayong sulod sa mga department store, mas labaw pa nga angay’ng dakpon ang tawo nga manghulga nga dunay mga bomba nga moulbo sa Cebu City Hall.

Suporta ko ni Vice Mayor Edgardo Labella nga kon tinuod man nga kanhi kawani sa City Hall ang maong tawo nga nanghulga pinaagi sa text message nga adunay bomba nga mobuto sa Cebu City Hall, dili siya angay’ng pasayloon. Gikutlo man gud sa mga reporters ang suod kaayo nakong kumpare nga si Konsehal Dave Tumulak nga malooy kuno siya nga mopasaka og kaso.

Ang gikatahapan nila nga naghimo sa pagpanghulga mao ang kawani sa City Hall nga gitaktak sa serbisyo. Dinhi nga bahina mura’g nasipyat ang akong kumpare kay ang maong tawo dili angay’ng pasayloon lang sa tumang kasayon. Sa ako na nga giingon, kon dakpon ug ikiha man gani ang mohimo lang pagkomedya nga dunay bomba sa iyang bag pagsulod sa department store, labaw pa nga angay’ng dakpon ug ikiha ang nanghulga g’yud nga may bomba nga mobuto sa City Hall.

Tumong sa maong tawo nga magkaguliyang ang mga kawani sa City Hall ug dili na kini makaserbisyo sa katawhan. Sa ato pa, dili g’yud siya angay’ng pasayloon.

* * *

Wala’y hunong ang pagkapatay sa mga tawo nga gituohang drug pushers kay misukol kuno sa mga polis atol sa buy-bust operation. Angay lang nga kining mga tawhana pamatyon sa mga kapolisan kon sila mosukol.

Mas motuo ko sa kapolisan nga nanukol g’yud kining mga tawhana kay sinati na nako ang batasan niining mga drug pusher nga may pagka hambugero. Sagad sa mga pushers may mga patik sa ilang lawas ug magpatuo nga mga baksik.

Daghang pushers ang magdala-dala gani og armas kay andam silang mopatay kon maapikehan. Tuod, kon masayod sila nga polis ang mabaligyaan nila og shabu, molanit dayon sila og armas. Wala sila masayod nga andam na ang mga back-up sa mga poseur buyer.

* * *

Daghan karon ang nahadlok sa ngalan pa lang ni Chief Inspector Jovie Espenido kay kuno mopatay g’yud og dagko nga mga nalambigit sa drugas. Malipay g’yud ko kon si Espenido anhi madestino sa Sugbo.

Paminaw ko, duna g’yuy mga tawo nga nalambigit sa ilegal nga drugas nga magkurog sa kalisang. Awhagon nato si PNP Chief Ronaldo “Bato” dela Rosa nga anhi sa Sugbo idestino si Espenido.

 

  • Follow Us: