Inilog si Espenido

Human sa dugoon nga raid didto sa dakbayan sa Ozamiz dili pa lang dugay, inilog karon si Police Chief Inspector Jovie Espenido. Kon asa siya ilabay sa liderato sa Philippine National Police, makapaabot kita nga adunay mobuto na usab nga dako’ng panghitabo.

Human sa kamatayon sa mayor sa Ozamiz nga si Reynaldo Parojinog, ang usa sa giakusahan nga nalambigit sa negosyo sa gidiling druga, mora’g human na usab ang tour of duty ni Espenido isip hepe sa kuwerpo sa kapolisan sa maong siyudad.

Kon asa ang iyang bag-o nga assignment, ang hepe sa Philippine National Police lang ang nasayod. Apan usa ka butang nga napanid-an sa tanan, nga ang sunod nga assignment ni Espenido adto sa lugar diin naghitak ang ilegal nga druga. Kini sama pananglit sa Metro Cebu, ilabi na sa dakbayan sa Sugbo, diin hilabihan pa gihapon ang sirkulasyon sa druga bisan pa man sa gihingusgan nga kampanya sa otoridad batok niini. Siguro, welcome kaayo si Espenido dinhi.

Kini ilabi na nga daghan pa gihapon ang mga gaway sa natiklo na nga mga dagkong drug personalities dinhi. Gani, ania man sa Sugbo ang giakusahan ni Presidente Duterte nga duha sa labing dako nga nalambigit sa druga sa nasud.

Hinuon, sa maayo nga performance sa otoridad sa Sugbo batok sa druga, dili na siguro pa gikinahanglan ang serbisyo ni Espenido dinhi. Gani, matag adlaw aduna g’yuy matiklo ang lokal nga kapolisan nga mga high-value targets sa negosyo sa druga.

Mao na nga mas maayo nga adto ilabay si Espenido sa lugar diin padayon nga naghitak ang druga apan ang kapolisan kulang sa paningkamot pagsumpo niini, kay aron nga mokurog gayud kadtong mga nalambigit niini kay lagi mawad-an na sila’g padrino sa lokal nga kapolisan.

Dinhi lang sa Visayas, adunay mga sugyot nga adto i-transfer si Espenido sa mga lalawigan sa Iloilo ug Bohol. Kining maong mga lugar ang aduna kuno’y mga drug lord nga angay’ng isunod pagtumba niining padayon nga giyera batok sa druga.