Banat ( Leaderboard Top ), pagematch: 1, sectionmatch: 1

Grupo ni Dong

Kaingon ni Kenneth Dong, ang gipasanginlan nga fixer sa P6.4 bilyones nga shabu nga kontrabando gikan sa China, nga ang iyang pakigsuod sa inilang mga politiko ug mga artista makatabang niya sa bisan unsang kontrobersiya nga mahiagoman sa iyang mga negosyo.

Apan diha nga nahisgotan na ang iyang ngalan sa buwag nga mga imbestigasyon sa Senado ug House of Representatives, wa lang mokalit og panghunaw ang tanan nga gituohan nga makatabang sa iyang kawsa, niawhag pa g’yud sila nga panangtangon ang ilang mga letrato gikan sa Facebook ug ubang social media networks.

* * *

Mao nga kon susihon nimo karon sa Facebook, Twitter, Flickr ug ubang social media networks, dili na ka makakita og bisan unsang letrato ni Dong. Bisan sa kontrobersiyal niyang kasal usa ka adlaw human sa makalilisang nga bagyong Yolanda niadtong 2013 nga gitambongan sa iyang natabangan nga mga senador.

Sa usa lang ka pamilok, dili na ka makakita ni Dong sa social media, nga makapakugang sa mga naanad na sa nagbaha niya nga mga hulagway uban sa mga senador ug ubang dagko nga opisyal sa gobiyerno ug mga artista.

* * *

Nakalimot si Dong nga ang Google mopakita sa iyang mga letrato bisan gitangtang na niya gikan sa orihinal nga websites. Kon dili na ka makakita sa imong gipakita nga artikulo sa orihinal nga websites, ang Google motanyag nimo og alternatibong paagi sa pagkuha sa kasayuran pinaagi sa naletratohan nilang web pages pinaagi sa option nga gitawag nilang “cached.”

Mao nga dili kapaabot si Dong nga ang gipabuhagay nga gamhanan niyang mga koneksiyon sa gobiyerno, mga negosyante ug mga artista mapapas lang sa usa ka pamilok kay naapiki na ang iyang ngalan.

* * *

Ang netizens maoy labing dakong alyado sa Police Regional Office sa Central Visayas nga nakugang sa kontrobersiya ug naglisod sa pagsubay sa paspas nga pagburot sa katigayonan ni Dong.

Sila ang nipakatap sa mga hulagway ni Dong uban nila ni Davao City Vice Mayor Polong Duterte ug ubang mga politiko.

Apan kasaligan namong tinubdan miingon nga si Dong mao ra’y hulagway sa grupo nga iyang girepresentahan. Mas dagkong negosyante ang iyang girepresentahan. Busa sama ni Dong sila ang angay nga manubag sa tanang pagduda sa ilang salida.

leo_lastimosa@abs-cbn.com

  • Follow Us: