Banat ( Leaderboard Top ), pagematch: 1, sectionmatch: 1

EDITORYAL - School-based tukhang

Nabalaka ang kahugpongan sa mga estudyante, partikular na ang mga militante, nga kining kampanya sa nasud kontra ilegal nga drugas moabot sa eskuylahan ug magamit na hinoon batok sa mga estudyante. Sa miaging semana, ang mga militanteng estudyante mipadayag nga nabalaka silang adunay mahitabong school-based Tukhang, sama sa gipatuman nga Oplan Tukhang sa kapolisan, batok sa mga nalambigit sa ilegal nga drugas sa kabarangayan.        

Ang kampanya nagbilin og duguong dalan ug dili kalikayan nga nakuwestiyon ang ka-lehitimo sa mga police operations tungod sa pagduda nga gilaktod nila ang balaod ug gipatuo ra nga nanukol ang ilang mga dakponon. Apan dili malilong nga daghan na g’yud nga mga estudyante ang nagumon sa ilegal nga drugas ug aduna pa’y daghang posibleng gusto nga mosuway niini tungod sa kakuryoso o pagdani sa mga classmates o barkada.

Gani sa miaging adlaw, adunay 23 anyos nga nagtungha sa usa ka unibersidad ang nadakpan ug nakuhaan og balor P12 milyones nga shabu. Dili lang siya ang unang estudyante nga nadakpan sa pagkalambigit sa illegal drugs, may daghan pa. Kini maoy hinungdan nga mabalaka g’yud, dili lang mga school officials, kondili, hasta ang mga ginikanan. Samtang tuod lehitimo ug alang sa kaayohan sa kabataan ang tumong sa pagpaubos sa random drug testing sa mga estudyante, dili unta kini sagolan og binuang sa mga otoridad ug school officials.

Balido kaayo ang kabalaka sa mga militanteng estudyante nga basin ipiton sila sa school officials gamit kining kampanya batok sa ilegal nga drugas. Ang mga estudyante adunay mga lehitimong isyu batok sa mga school officials, sama sa pagdumala sa eskuylahan, kurapsyon,  mga pasilidad, abuso sa mga magtutudlo ug uban pa. Kining kampanya kontra ilegal nga drugas, mahimo kaayong gamitong hinagiban aron manabla ang mga kurakot ug abusadong schools officials.

Mas maayo nga ang kagamhanan mangita og laing paagi nga mosalig ang estudyante sa himoong kampanya diha sa ilang mga tunghaan.

  • Follow Us: