Wala nay BRT?

Gipahibawo ni National Economic Development Authority (NEDA) Secretary Ernesto Pernia nga ihunong lang una ang pagpatuman sa Bus Rapid Transit (BRT) dinhi sa dakbayan sa Sugbo samtang himoon pa ang dugang pagtuon sa P16.9 bilyones nga transport project nga gastohan sa nasudnong kagamhanan gikan sa huwam sa World Bank.

Si Presidential Assistant for the Visayas Mike Dino mirekomendar ngadto sa Malakanyang sa dili usa pagpadayon sa proyekto kay dili pa karon haum sa dakbayan sa Sugbo ang BRT tungod sa kagagmay sa atong mga karsada. Si Transportation Secretary Arthur Tugade midani pa gani ni Dino pagsuporta sa pagpatuman sa proyekto nga giaprobahan sa nasudnong kagamhanan sa panahon ni kanhi presidente Noynoy Aquino.

Ang BRT, proyekto ni Mayor Tomas Osmeña. Ang mayor ug si Dino dili maayo og relasyon. Kining duha ka opisyal pulos adunay inpluwensiya sa gobiyerno. Ang BRT sukdanan sa kagamhanan sa duha ka opisyal sa atong gobiyerno. Dinhi nato makita kon kinsa ang mas gamhanan sa duha. Karon nga gisugyot nga ihunong ang BRT project, maingon ba nato nga mas gamhanan gayud si Dino kay ni Osmena?

Sa laing punto, dili nato tan-awon ang isyu sa BRT pinaagi sa inpluwensiya sa duha ka opisyal, kon dili, sa iyang bentaha ug disbentaha. Mao usab kini ang akong gituohan nga rason nganong pugngan lang una ang pagpatuman sa proyekto. Gusto niini nga tun-an pa kini og maayo.

Kon ang hanas sa mass transportation ang paminawon, dili gayud haum sa dakbayan sa Sugbo ang BRT tungod sa kagagmay sa atong mga karsada. Sa ato pa, sa dili pa ipatuman ang BRT, angay’ng palapdan daan ang mga dalan. Ang pagpalapad sa karsada nanginahanglan og dakong kantidad. Mao kini ang rason ngano nga miburot ang kantidad sa proyekto gikan sa P10.6 bilyones ngadto na sa P16.9 bilyones.

Tan-aw nako, ang BRT dili makasulbad sa suliran sa huot nga trapiko sa dakbayan sa Sugbo, busa nganong ipamugos man kini?