Bintot-bintot kinsa’y mosunod?

Susama sa usa ka teleserye ang nahitabo nga kampanya batok sa ilegal nga drugas sa administrasyong Duterte, nga adunay Book 1, ug Book 2.

Sa Book 1, kadto lang mga gagmay, o gitawag sa uban nga “bukot-bukot” nga mga nalambigit sa drugas ang nangamatay.

Kini ilabi na kon mosukol kuno sa mga otoridad, segurado g’yud nga tiklo atol sa gitawag nila nga legitimate operation.

Samtang lahi pa ang gitawag nila nga mga biktima sa extra-judicial killing, diin ang mga suspek, mga riding-in-tandem.

Karon nagkakulbahinam na ang dagan sa estorya sa druga-serye kay ang mga target, kadto na nga mga dagkong isda sa sindikato sa drugas.

Human sa kamatayon ni Albuera, Leyte Mayor Rolando Espinosa, mas nimugna og kusog nga pagtay-og ang kamatayon sa mga Parojinog sa Ozamiz City, lakip ni Mayor Reynaldo Parojinog, iyang asawa nga si Susan, igsuon nga si Provincial Board Member Octavio Parojinog, ug mga ginsakpan.

Kinsa ang magdahum nga mapukan ug maibot ang labing lig-on nga bansagon nga dugay na nga gilambigit sa kriminalidad?

Adunay mga mikuwestiyon sa proseso nga gipatuman atol sa pagpangronda sa mga otoridad, apan mura’g magpabilin ra kini nga pangutana ug dili makapatay-og sa determinasyon sa atong gobiyerno pagpuhag sa mga nalambigit sa drugas.

Sa mga ginganlan ni Presidente Duterte, karon pa lang daan, magbintot-bintot na lang mo kon si kinsa ninyo ang mosunod. Atangi!