EDITORYAL – Ayaw kwentaha ang karon

Libre nga tuition sa mga state colleges ug universities sa nasud magbunga og maayong kaugmaon, dili lang sa kabataan, kondili, sa tibuok nasud sa umaabot nga panahon. Maayo nga bisan pa man sa mga pagduhaduha ug pahimangno sa mga economic managers ni Presidente Duterte, wala g’yud siya magpadala kanila ug iyaha g’yud nga gipirmahan ang Universal Access to Quality Tertiary Education Act.

Siguro sa mga kritiko sawayon si Duterte kay lagi maglisud g’yud pagpangita ang gobiyerno og pundo aron masustenihan ang maong programa. Ang tawag niini “political will.”  Ang pagpangita og pundo nga salapi para sa maong proyekto, trabaho na sa Department of Finance. Ang importante nga may kahigayonan na nga libreng makaeskuyla ang kabataan, ilabi na kadtong mga anak sa kabus nga pamilya, apan lantip og salabutan. Kon adunay maayong edukasyon ang kabataan, dako kaayo ang ilang tsansa nga makatrabaho ug makadawat og sweldo nga mas labaw pa sa ilang mga ginikanan.

Mangahulogan kini nga momenos na unya ang kabataang magsalig lang sa ilang mga ginikanan. Makatrabaho na sila ug makalikay sa dautang mga bisyo, o ba kaha mahimong kriminal kay maghatag kini og dugang kahulogan sa kinabuhi isip mga kabus. Unom ka tuig pa gikan karon matagamtaman sa gobiyerno ang bunga gikan sa mga mogradwar ubos sa libreng tuition fees kay sila mo-generate man g’yud og economic activities sa nasud sa ilang pagpanaraho.

Kon dunay trabaho ang kadaghanan sa mga tawo, daghan ang makakaya pagpalit, busa  daghan na usab makolektang buhis. Sa samang higayon, mapuslan na ang abilidad sa kabataang kabus nga wala makaeskuyla tungod lang sa kawad-on. Busa dili lang unta una hunahunaon ang kahago pagpangita og pundo, ug tan-awon ang umaabot nga panahon. Matud pa sa panultihon, ang edukasyon maoy magsalbar gikan sa kakabus. Bahandi kini nga dili makuha ni bisan kinsa, apan sama sa kabililhon sa bulawan.