Basola ayaw (Part II)

Ang gahum pagsulbad sa gidiling drugas gihatag sa PDEA ug sa ubang law enforcement agency sa nasudnong kagamhanan, ug ang maong gahum wala sa mga opisyal sa barangay.

Ang mga opisyal sa barangay nagpanagana sa pag-abag sa mga ahensiya sa gobiyerno nga gitahasan pagsulbad sa suliran sa drugas tungod kay wala sila makaseguro sa ilang pagkamatinud-anon. Dili mabasol niining puntoha ang mga opisyal sa barangay tungod kay ang mga law enforcement agency mismo ang hinungdan.

Diin man kaniadto ang Philippine Drug Enforcement Agency? Ang PDEA milihok lang human mapili nga presidente si Duterte. Kaniadto ang PDEA ug polis nakigdulog sa mga drug lord. Ang mga drug lord gihimong gatasan sa ubang sakop sa PDEA ug mga polis.

Gani ang mga opisyal sa kapolisan nga akong nailhan nga dunay prinsipyo ug nakauban sa kampanya batok sa gidiling drugas, miapil na og dawat sa salapi gikan sa drugas. Ang rason, kabalaka nga sila ang mawagtang sa katungdanan o ba kaha sa kalibutan. Wa sila masayod kinsa sa ilang kauban ang protector sa gidiling drugas. Sa mga opisyal sa barangay nga nalambigit sa suliran sa gidili nga drugas, biya kamo sa inyong katungdanan. Ayaw mo pagpabaga sa inyong nawong. Ayaw ninyo mansahi ang imahe sa maayong pagpangalagad sa barangay.

Kon nagpapili ka man aron imong mapalapdan ang imong negosyo sa gidili nga drugas, biya kay wa ka’y luna sa bisan unsa ug bisan asa nga katungdanan sa gobiyerno. Angayan lang kamo sa prisohan o sa lubnganan. Mga dangan ug kagaw kamo sa katilingban.

Ang mga opisyal sa barangay, sumbanan ug modelo sa kaayo, giya sa katawhan sa tul-id ug maayong dalan, ug dili sa kaalaotan. Mao nga sa suliran sa gidili nga drugas kamo ang angay’ng mag-una sa pag-abag sa ahensiya sa nasudnong kagamhanan sa pagdakop sa mga nalambigit sa gidiling drugas, ug dili kay kamo ang dakpon.