Basola ayaw

Mura’g gihan-ok sa gobiyerno ngadto sa mga opisyal sa barangay ang suliran sa gidiling drugas. Una, gisuspenso ni Presidente Rodrigo Duterte ang piniliay sa barangay nga gitakda unta niadtong miaging tuig tungod sa kabalaka nga maoy mapili ang mga nagpayuhot, ug ang gisuportahan niadtong mga nalambigit sa ginadili nga drugas.

Karon pud, posible nga wala na’y piniliay tungod sa mao gihapon nga rason.

Ikaduha, ang Department of the Interior and Local Government (DILG) nagpagawas og estrikto kaayo nga kamandoan ug nagpagahin gayud og usa ka porsiyento sa Internal Revenue Allotment (IRA) sa barangay para sa kampanya batok sa drugas.

Ikatulo, gibaharan sa Philippine Drug Enforcement Agency (PDEA) ang mga opisyal sa barangay nga pasakaan og kaso kun dili moabag kanila sa pagdakop sa mga nalambigit sa gidili nga drugas. Tungod niini, ila nga gisampolan ang mga opisyal sa Barangay Ermita diin tungod sa kaso nga ilang gipasaka, wala g’yuy nahibilin nga opisyal sa maong barangay kay gihurot man og suspenso sa Ombudsman.

Akong klaruhon dinhi nga dili nako tumong ang pagpanalipod sa mga opisyal sa barangay nga nalambigit sa gidili nga drugas. Ang akong tuyo   dinhi mao lang ang pagpaabot ngadto sa atong nasudnon nga kagamhanan ug mga ahensiya sa gobiyerno nga “Foul” ang ilang paghan-ok sa suliran sa gidiling drugas ngadto sa mga opisyal sa barangay.

Akong nakita nga ang kapakyas sa mga ahensiya sa nasudnong kagamhanan pagsumpo sa suliran sa drugas, ila kining gipasangil ngadto sa mga opisyal sa barangay. Ang mga barangay opisyal maoy gihimo nilang “scapegoat” o tagoanan sa ilang kapakyas pagsumpo sa suliran.

Angayan nga hinumdoman sa mga nasudnong ahensiya sa gobiyerno nga gitahasan pagsumpo sa ginadili nga drugas nga ang mga opisyal sa barangay igo lang kini nga magsawo sa inyong mga tagak. Buot nako nga ipasabot nga inyo ang trabaho pagsumpo sa gidiling drugas ug ang iya sa mga opisyal sa barangay mao lang ang pag- abag kaninyo.