Dako nga isda

Human sa iyang pagkasikop tungod sa giingong ilegal niya nga pagtiner og mga armas, gisalikway ni kanhi Medellin mayor ug karon konsehal sa maong lungsod nga si Ricky Ramirez ang mga pasangil nga tiggamitan siya og ilegal nga druga.

Atol sa operasyon sa kapolisan sa iyang panimalay sa maong lungsod, adunay mga drug paraphernalia ang ilang nadiskobre. Kini wala pa’y labot sa nagkalainlaing mga armas nga ilang nakuha nga maoy subject sa search warrant gikan sa korte.

Sa iyang pag-atubang sa media, gibaliwala ni Ramirez nga usa siya ka high-value target sa kapolisan tungod sa giingong kalambigitan niya sa ilegal nga druga, ilabi na nga adunay mga drug paraphernalia ang ilang nakuha atol sa ilang raid.

Kusganon usab niyang gihimakak nga tiggamitan siya og druga base sa pasangil sa kapolisan. Gipanag-iya kuno sa usa sa iyang kanhi sakop sa panimalay kadtong nakuha nga mga drug paraphernalia. Hinuon iyang giangkon nga sa batan-on pa siya, mogamit usahay siya og druga.

Hinuon, iya usab kana nga rason. Kon katuohan ba kini, depende kana sa inyong pag-analisar. Apan usa lang ang paagi aron matubag ang alegasyon nga tiggamitan ba siya og ilegal nga druga. Kini mao ang pagpailalum kaniya sa drug test.

Si Ramirez maoy labing dako nga isda ug inila nga nasikop sa otoridad sa ilang kampanya batok sa druga dinhi sa probinsiya. Dili pa lang dugay, adunay mga konsehal usab sa lungsod ug mga kapitan sa barangay nga nalambigit sa druga ang nasikwate.

Ug nagpamatuod lang kini nga adunay dako nga basehan ang hagbay ra nga giyawyaw ni Presidente Rodrigo Duterte nga hilabihan ka daghan sa mga opisyal sa mga lokal nga kagamhanan ang mismo nalambigit niining maong ilegal nga binuhatan.

Nagtuo ako nga daghan pa nga mga badlongong opisyal dinhi sa lalawigan sa Sugbo ang padayon nga nalambigit sa druga ug ubang ilegal nga binuhatan, ug ang dako nga tahas karon sa otoridad mao ang paggukod ug pagsignit kanila.