Diborsiyo

Duna’y usa ka columnist sa nasudnong mantalaan miingon: “Do what all the world does: have a divorce law.”

Buot niya nga tungod kay gitugot man sa tibuok kalibutan ang diborsiyo, ato usab kining himoon dinhi sa atong nasud, pinaagi sa pag-legalize sa diborsiyo. Mao ra man og duna’y pending bill diha sa Kongreso nga mag-legalize sa diborsiyo, kon wa ko masayop gipasaka sa mga babayeng kongresista.

Lagmit kining mga bayhana, either naproblema sa ilang mga bana, o sila mismo maoy problema, hinungdan nga gustong makigdiborsiyo.

Giingon nga duha ka women’s rights ug party-list group Gabriela mi-file sa ikalima na nga higayon og balaudnon nga mag-legalize na sa diborsiyo, apan matud pa, to no avail.

Lagmit, ang mga conservative nga lalaking kongresista, dili buot makigbulag sa ilang asawa, ug lagmit wa sab sila magpabadlong sa ilang asawa.

Ato ning gihisgutan dinhi tungod kay sa atong pakighimamat sa kauban natong mga senior citizen, atong nakita nga wala sila’y problema sa ilang panagtiayon. Kon duna man, tungod kay usahay dili man kalikayan ang panagsungi sa bana ug asawa, kaylagi, wala may perfect marriage,  apan, ang maong differences dili mo-warrant sa panagbulag.

Sa ato pa, ang ato karong mga senior citizen mitamod pa sa sugo sa Dios nga ang kahiusahan sa Kahitas-an, dili mabulag sa tawo. Let no man put asunder.

Lagmit ang umaabot nga senior citizens, mga modern husbands and wives, ila na nga isalikway kining pahimangno sa Ginoo, ug duladulaan na lang ang kaminyoon. Gani ang uban tingali, diritso na la’g puyo-puyo, dili na magpakasal, aron sayon ang pakigbulag.

Pagkakaron, atong makita nga ang mga senior citizen supak usab sa divorce law dinhi sa atong nasud, bisan pa’g gisagop kini sa tibuok kalibutan.

Matud pa niining maglilindog nga atong gihisgutan dinhi, kita ra kuno sa tibuok kalibutan, gawas sa Vatican, ang pinuy-anan sa Santo Papa, nga walay “proper divorce law.”

Kining ilang giingon nga gisagop kini sa tibuok kalibutan, unsa man, nakasulbad ba kini sa mga family feuds worldwide? Hinaot nga inigtuki nila niini diha sa Lower House, matubag ang pangutana kon ang diborsiyo mao ba ang ultimate nga sulbad sa dili magkasabot nga magtiayon?

Unsa man ang mga repercussions niini? Ang mga anak? Unsa may mahitabo sa gitamod nga maayong pagkabugkos nga Filipino Family?

Unsa kaha ang mahitabo sa atong mga banay kon ma-legalize na ang diborsiyo? Dili kaha modaghan ang juvenile delinquency, ug modagsang ang juvenile nga mga parents?