Kinsa’y nabalaka sa Martial Law?

Sa nakalabay nga mga adlaw, miuli ko kadali sa among pinuy-anan sa lungsod sa Tambulig didto sa lalawigan sa Zamboanga del Sur aron sa pagduaw sa haya sa among amahan kinsa mitaliwan na ngadto sa laing kalibutan sa pangedaron nga subra sa 80-anyos.

Sa pagdunggo pa lang sa barko didto sa dakbayan sa Ozamiz, dako ang akong pagtuo nga daghan na ang nagkatap nga kasundalohan. Tungod lagi kay Martial Law na sa tibuok Mindanao, nag-expect ako nga nakaposte sila bisan asa nga dapit didto.

Apan sa akong pag-abot sa siyudad sa Ozamiz, wala ko kakita og usa ka sundalo nga naglakaw sa karsada. Linaw ang palibot ug wala’y mga checkpoint nga usa sa mga talan-awon kaniadtong Martial Law niadtong rehimen ni Marcos.

Gikan sa maong dakbayan paingon ngadto sa among lungsod sa Tambulig, wala g’yud ako nakabantay og mga sundalo nga naka-standby sa national highway sa akong taas nga pagbiyahe, ug misamot na hinuon ang akong pagkakuryoso.

Mao na nga daghan ang akong gipangutana sa among mga silangan mahitungod sa epekto sa implementasyon sa Martial Law. Apan usa lang ang ilang tubag, nga wala kuno’y kausaban sa sitwasyon ilalum niining pagpatuman sa Martial Law.

Hinuon matud nila, nga sa mga lugar duol sa dakbayan sa Marawi ug Lanao del Sur, hugot kuno ang siguridad nga gipatuman sa kasundalohan. Kini aron nga dili makaipsot ang mga terorista nga gigukod karon sa otoridad.

Sa akong pag-uli sa Mindanao wala usab ako nakasagap og mga report kabahin sa paglapas sa militar sa tawhanong katungod. Sa akong eksperyensiya sulod sa pipila ka adlaw didto, normal lang ang dagan sa kinabuhi didto sa among lugar ilalum sa Martial Law.

Dako g’yud nga sayop kadtong mga nagsige og sing-al, ilabi na niadtong tua nagsige og reklamo sa kaulohan, batok sa Martial Law. Dako kini og kalainan niadtong balaod militar panahon sa rehimen ni Marcos ug nga dili sila angay nga mabalaka.