Hustisya dili alang sa kabus
Dihang nauli ang iyang 13 anyos nga anak nga nagkadugo ang bilahan ug nangangkong gilugos og abogado nga magsisibya pila ka oras human sa insidente, gidala sa amahan ang tibuok niyang pamilya — iyang asawa ug tulo ka anak apil na ang ikaduha nga maoy biktima —ngadto sa Pink Room sa Vicente Sotto Memorial Medical Center (VSMMC).
Apan kay adlaw man nga Sabado, wa’y doktor sa pink room. Gipabalik sila pagka Lunes na. Nasusi sa mga doktor ang kahimtang sa bata ug natino nga napanamastamasan siya tulo ka adlaw na human sa insidente.
* * *
Ang labing masulub-on nga hulagway sa kasinatian sa pamilya sa bata, nga bisan sa mga hudlat ug mga pasidaan nihukom sa pagbarug pagpangita og hustisya, mao nga ang ilang kakabus ug kagamay maoy labing dakong babag sa ilang pakigbisog.
Pasiunang mga institusyon nga ilang giduol pulos nagpakita nga wa mag-apura ang sistema sa hustisya sa pagtabang nila. Human sila gipabalik-balik sa Pink Room sa VSMMC, gipabalik-balik sab sila sa Parian Police Station nga ubos sa Cebu City Police Office (CCPO) ug labaw pa nga gipabalik-balik sa rehiyonal nga buhatan sa National Bureau of Investigation (NBI).
* * *
Ang kakuwang sa mga doktor ug mga kawani sa Pink Room wa hinuon mosangpot sa kakuwang og pagpakabana. Gitunol dayon nila ngadto sa presinto sa Parian ang biktima ug ang medical certificate nga nahilabtan siya.
Nasamotan ang kalbaryo sa pamilya sa biktima sa pag-abot nila sa presinto sa Parian. Inay andamon dayon ang kaso nga pagpanlugos, niinsister ang mga polis pagpangita og dugang ebidensiya. Ang kagaw sa paglangay-langay nanakod sa NBI.
* * *
Nangita pa ang mga polis og CCTV pagsusi kon tinuod ba ang sulti sa bata nga gilugos siya sulod sa sakyanan sa abogadong magsisibya. Samtang gi-drug test sa NBI ang amahan sa bata ug gisukit-sukit ang iyang mga kauban sa klase ug mga magtutudlo.
Namasin ba ang mga polis nga nalilian sa CCTV ang pagpanlugos? Nagpaabot ba ang NBI nga mapapas ang dokumento sa pagpanlugos kon adik ang amahan (negatibo siya sa drug test) ug kon mapamatud-an nga wa siya ma-enrol sa nagpadayon nga school year? O naglubay-lubay lang kay trisikad driver ang amahan ug labandera ang inahan sa biktima samtang abogadong magsisibya ang gipasanginlan?
- Latest
