Sugbo tay-ogon sa ‘The Big One’

Gipaubos og seminar-workshop ang tanang mga opisyal sa Local Disaster Risk Reduction and Management Office sa kalungsoran ug mga component cities sa lalawigan sa Sugbo.

Sentro sa ilang gituki ang pagpangandam sa posibleng pagtay-og sa kusog nga linog, ug kon unsa man kaandam ang Sugbo pananglit mahitabo ang gikahadlokan nga katalagman.

Si DOST Undersecretary Renato Solidum, ang ilang guest speaker, miklaro nga ang gipangandaman nga “The Big One” o 7.2 magnitude earthquake, dili lang diay nakasentro sa Metro Manila nga maoy sagad nato mabati sa mga balita.

Gibutyag ni Solidum nga ang tanang dapit sa nasud nga adunay faultline, posible nga aduna usa’y The Big One nga moabot.

Ang Sugbo may upat kuno ka faultline, diin usa niini ang ania sa Central Cebu.

Diha nga akong gipangutana si Usec. Solidum kon unsa ka dako ang damage kon moigo ang 7.2 magnitude nga linog dinhi sa Sugbo, matud niya hilabihan ka dako g’yud diin moabot kini sa intensity 8.

Wala hinoon siya mobutyag kon pila ang banabana nga casualty kon mahitabo kini sa Sugbo tungod kay padayon pa ang ilang pagtoon niini.

Apan sa Metro Manila, gi-estimate nila nga moabot sa 35 mil ka kinabuhi ang makalas kon uyogon na kini sa 7.2 magnitude nga linog.

Magdepende ang ilang banabana sa population sa lokalidad, ug kon unsa nga oras moigo ang linog, sa gabii ba o sa adlawan.

Mas delikado usab ang small and medium rise bulding, sama sa mga panimalay kay mao kini ang seguradong matumpag, matud ni Solidum.

Gidugang niya nga ang mga high rise building mas gamay ang kahigayonan nga malusno tungod kay aduna kini katakus sa pagbalanse.

Dili sa pagpanghadlok, apan karon pa lang daan, angayan na kita nga mangandam.