Pagpatuyang sa gibati
Kon patuyangan sila si Presidente Rodrigo Duterte ug ang iyang mga sinaligan, mangligdas sa kadalanan ang tanan nilang gipasanginlan nga mga kriminal ug mga durugista, mapapas na ang Court of Appeals (CA) ug mahukasan sa ilang lisensiya pagka manlalaban ang mga mahistrado, makandadohan ang Kongreso ug mausab ang 1987 Constitution.
Dili kana ra. Kon wa’y makapugong nila, si Duterte ang mouna paglugos sa langyaw’ng misyonera nga sama kaguwapa sa artista ug makapanglugos ang mga sundawo ug mga polis og hangtud katulo, ug mahimo ra nga ibasura ang kaminyuon kon dili na malipayon ang magtiayon.
* * *
Labing uwahi nga puntirya sa kasuko ni Duterte mao ang Commission on Human Rights (CHR), nga iyang giisip nga maoy labing dakong babag sa iyang kampanya batok sa ilegal nga drugas. Ambot may nakahunghong ba niya nga ang CHR dili angay’ng daginuton.
Tungod sa talagsaon niyang popularidad, ang CHR inutil sa ilang gimbuhaton. Ang mga imbestigasyon sa CHR sa mga pasangil sa extrajudicial killings sa Sugbo, ug ubang bahin sa nasud, wa kaugpo kay pulos nahadlok ang mga saksi ug mga tagtungod.
* * *
Apan ang CHR dili diay mahimo nga papason tungod lang sa sulti ni Duterte kay segun sa kadagkoan sa ahensiya may mas kuti diay nga panginahanglan, kini mao ang tukma nga kausaban sa batakang balaod.
Wa hinuoy arang ni Duterte. Ang iyang hingpit nga pagkontrolar sa nagkalainlaing mga institusyon sa gobiyerno mahimo nga mopasayon sa pag-usab sa sistema sa kagamhanan ug pagpapas sa tanang babag sa pagpabarug og lab-as nga diktadura.
* * *
Si Duterte wa matawo gahapon, mao nga atubangan sa lapad nga suporta sa kinabag-an sa katawhan sa bisan unsa nga kuwestiyonable niyang mga sulti ug mga lakang sa kapin sa tuig na niyang pamunoan, masuk-anong gikutikuti sa pagsalikway ang matag usa sa mga pagsaway batok sa iyang pamunoan.
Kay ang nanggungis na nga bagis sa Davao maoy labing nasuheto nga ang iyang kahumot dili dumalayon. Nga ang lehitimo nga mga pagsukwahi sa iyang mga pagpatuyang motuhop ra sa kabuot ug panghunahuna sa katawhan.
Siya ang labing nahibawo nga wa’y aso nga makumkom. Nga sa dili madugay mabantang na sa katawhan ang tinuod niyang dagway. Nga gawas nga dili nila magustohan mahimo sab nga makaaghat nila pagpalayas niya sa katungdanan.
- Latest
