Ang SONA

Ang State of the Nation Address (SONA), gahum sa presidente nga gihatag sa batakang balaod aron iyang mapahibawo ngadto sa katawhan ang iyang mga nahimo sa miaging tuig ug ang iyang gusto nga himoon sa kasamtangan ug moabot nga tuig.

Sigun sa naandan, himoon kini sa presidente atubangan sa mga sakop sa kongreso kay ang mga kongresista mao man ang representante sa katawhan. Sa karaang panahon nga nihit pa kaayo ang komunikasyon, mahinungdanon kaayo ang SONA nga himoon sa presidente atubangan sa mga kongresista kay sila man usab ang mopahibawo niini ngadto sa katawhan.

Ning bag-ong panahon, ang SONA makonsiderar na lang nato nga usa ka seremonyas, pasundayag sa entablado, fashion show, ug panagtapok sa mga gamhanan sa katilingban. Kini tungod kay hapit tanang gusto nga masayran sa katawhan gikan sa iyang gobiyerno, mahimo na niya kini pinaagi lang sa pagpindot sa iyang gadgets.

Sa SONA ni Presidente Rodrigo Duterte, iyang gidemanda sa mga Amerikano ang pag-uli sa kampana sa Balangiga nga gidala sa mga Amerikano human sa Filipino-American war nga miresulta sa masaker sa Balangiga diin gipangpatay sa mga Amerikano bisan ang mga bata nga nag-edad pa lang og dies-anyos, basta makadala o makabitbit lang og armas.

Ang kampana sa Balangiga giingon sa presidente nga kabahin sa kasaysayan sa Pilipinas, busa kinahanglan nga iuli na kini sa mga Amerikano sa Pilipinas.

Kon ato na man lang gani nga kuhaon ang mga kabtangan nga gipanag-iya sa Pilipinas apan tua sa mga kamot sa taga laing nasud, ngano nga wala na man lang apila ni Duterte ang pagdemanda nga iuli sa China ang mga isla nga ilang gikuha gikan kanato, sama sa Bajo de Masinlok ug uban pa? Ngano man kaha?