Mga hagba ni Duterte
Human sa kapin sa tuig nga pagdumala sa Malakanyang, makapangangkon na si Presidente Rodrigo Duterte og kalampusan sa pipila sa iyang gisaad sa niaging kampanya. Apil sa iyang ikapasigarbo mao ang pagdugang sa pension sa retiradong mga sakop sa Social Security System (SSS) ug pagpagawas og executive order sa Freedom of Information (FOI).
Apan dili makapatuyang og warawara si Duterte kay katunga ra sa gipasalig niyang P2,000 nga uminto sa pension sa SSS, ug inay mapaspas, nisamot hinuon kalangay ang pagkuha og kasayuran sa nagkalainlaing ahensiya tungod sa iyang FOI.
* * *
Ang labing dakong kapakyasan ni Duterte mao ang iyang gisaad nga malungtarong kalinaw ug kalamboan sa Mindanao. Bisan sa iyang pasalig nga hingpit na nga pulbuson, ang Abu Sayyaf, wa lang magpabilin sa Sulu, malampuson pa g’yud nga nakaabot sa Bohol.
Bisan sa pasalig nga mas suheto siya sa Mindanao ug busa mas takus nga mobaraw sa bisan unsa nga pagsuway pagsulod sa mga terorista, wa lang masudli, nasakmit pa g’yud sa ISIS ug Maute Group ang pipila ka bahin sa Marawi City ug nisulod na ang gubat sa ikatulong buwan.
* * *
Labing dako niya nga kauwawan mao ang kapakyas sa pagtuman sa saad pagsulbad sa kriminalidad ug ilegal nga drugas sulod lang sa tulo ngadto sa unom ka buwan.
Human nahilambigit ang mga polis sa pagpatay sa langyaw’ng negosyante sulod sa Kampo Crame, gisuspenso ang gubat aron malimpiyohan una ang kapolisan gikan sa mga badlungon.
Wa’y nahitabo nga bisan unsang kausaban gawas sa paghimo sa ngalan nga Oplan Tukhang Reloaded, gilusad pagbalik sa kapolisan ang gubat sa drugas. Bisan sa pangangkon nga naibanan na, mas daghan pa hinuong drugas ang ilang nasakmit.
* * *
Labing sipa nga pagkahagba sa pamunoang Duterte mao ang kapakyas pagkab-ot sa malungtarong kalinaw uban sa mga rebeldeng komunista. Human nipasalig nga suod niyang mga higala sila si Joma Sison ug ubang mga haligi sa Communist Party of the Philippines (CPP), kaduha na gikanselar ang sabutsabot ug kaduha na si Duterte nideklarar og gubat.
Napamatud-an sa pila na ka hugna nga sabutsabot, nga si Duterte kutob ra sa pag-apura og ceasefire. Apan wa mohimo og bisan unsa nga pagsuway pagtugkad sa gamot nga mga hinungdan sa rebolusyon.
- Latest
