Wala’y respeto sa pangulo

Asa ka makakita og presidente sa nasud nga personal nga makig-estorya sa mga tawo nga wala makagusto kaniya?

Siya ang labing gamhanan nga tawo sa nasud, apan wala kini huna-hunaa ni Presidente Rodrigo Duterte basta maatubang ug ikaestorya lang niya ang mga nagprotesta.

Apan wala kini hatagi og bili sa mga raliyista kinsa nagsinggit-singgit pa atubangan sa presidente.

Bisan gamay, wala sila morespeto sa atong pamuno sa nasud nga nirisgo gani sa iyang siguridad aron sila mahinabi samtang nagpahigayon og protesta duol sa Batasang Pambansa samtang si Duterte nihimo sa iyang State of the Nation Address.

Pagkawala na man lang g’yuy batasan niining mga tawhana. Tinuod duna kita’y katungod sa pagpadayag, apan kining naasoy’ng katungod dili nato himoon nga hinagiban sa dili pagrespeto ug pagyaga-yaga sa pangulo.

Gisinggit sa mga raliyista ang ilang mga sentimento nga ipadayon ang peace talk tali sa mga walhon nga grupo, apan sa ilang gihimo nakaingon ako nga dili sila sensiro.

Gipadayag nila ang hugot nga pagsupak sa martial law tungod sa kahadlok nga maabusohan ang tawhanong katungod.

Apan wala nila huna-hunaa nga kon gipig-otan pa ang ilang katungod, nahimo kaha nila ang pagsinggit ni Presidente Duterte?

Nanghinubra na sila kahilas nga gusto’ng modiktar kon unsa ang himoon sa atong presidente.

Kon gusto nila og respeto, kinahanglan nga makahibalo usab sila nga morespeto sa isigka tawo.