Brgy Gun-Ob, Lapu-Lapu City
“Hangyoon nako ang mga opisyal sa among barangay kay naay mga miyembro sa 4P’s, labi na diri sa Sitio Tugas, nga ang ilang madawat gipalit na man hinoon og shabu, imbes alang sa ilang mga anak.”
Brgy Sto. Niño, Toledo City
“May mga tricycle drivers nga gikan sa Balamban nga moabot man pagbiyahi diri sa among lugar bisan og dili ilang rota.”
Brgy Tubod, Minglanilla, Cebu
“Amo lang ireklamo kining mga basura diri sa among elementary school nga wala pa man gihapon kuhaa sa tigkolekta. Naay moari nga tigkuha pero dili man molahos diri sa among dapit.”
Brgy Pulangbato, Cebu City
“Grabe na kaayo ang abog nga mahanggap namo diri sa among lugar. Naa pa’y mga drivers sa 10-wheeler trucks nga kusog kaayong mopadagan, kuyaw kaayo sa mga bata”
Brgy San Nicolas Proper, Cebu City
“Naunsa na man intawon kining mga dispatcher diri sa Taboan nga namalik na man sab ni sila. Gidakop na man unta kini sila sa una, pero nagpabaga man gihapon sa ilang mga nawong. Maayo unta’g panakpon kini pagbalik.’
Brgy Hagnaya, San Remigio, Cebu
“ Diri sa Sitio Bahabaha ug Riverside kay misiaw man ang sugal ug ang ilegal nga swertres, pero wala man gidakop sa mga polis. Naa may patrol car nga mag-anhaan sa balay sa nagpasiugda niining mga sugal diri”
Brgy Catarman, Liloan, Cebu
“Kining Sitio Tiwasan ubos sa kapilya kay kon mag-uwan, mobaha dayon ug luoy kaayo ang mga nagpuyo diri. Wala man g’yuy nagpakabana nga mga opisyal. Mas maayo unta og naay gibutang nga taytayan.’
Brgy Lambug, Badian, Cebu
“Mohangyo lang kami sa mga opisyal sa among barangay nga pabutangan og mga tanod ang mga tourist destinations, O mga lugar nga suroyanan. Good job diay sa mga polis kay nakuha na nila ang ‘isda’ apan naa pa gihapon ang gitawag nga ‘balyena.”
Brgy Lawaan, Talisay City
“Naproblema g’yud ko niining mga basura sa Fairview Riverside luyo sa among balay kay baho kaayo. Manghinaot kami nga masulbad kini nga problema aron mahatagan og dinalian nga aksyon ang ubang mga problema.”
Brgy Palanas, Alcantara, Cebu
“ Ang among reklamo diri mao ang kabahin sa gripo sa tubig nga wa’y agas-agas. Sulod na kini sa taas nga panahon nga wala g’yud matagad sa mga hingtungdan nga mga opisyal “
Alang sa inyong mga reklamo text lang sa 09185482882
- Latest
