Martial Law ni Duterte

Duha ka adlaw sa wala pa ang State of the Nation Address ni Presidente Duterte sa hawanan sa Ubos Balay Balaoranan atol sa pagbukas sa lain na usab nga kongreso sa nasud, giaprobahan sa Kongreso ang “extension” sa Martial Law sa Mindanao hangtud sa katapusan ning tuiga, ug nagtuo ko nga kining Martial Law ni Duterte palapdan paingon nganhi sa Visayas, kon magpadayon ang pagpangatake sa mga rebeldeng New People’s Army (NPA) ngadto sa kapolisan ug kasundalohan sa Kabisay-an.

Dili kaayo nato mabati ang kapait nga kasinatian tungod sa presensiya sa mga rebeldeng NPA. Apan didto sa Mindanao, luoy kaayo ang mga tawo sa bukid nga magkurog sa presensiya ug pagpangatake sa mga rebelde. Si Duterte mismo nasayod nga daghan na nga mga rebelde nga mibiktima sa mga negosyante pinaagi sa ilang “extortion” nga gipaagi sa “revolutionary taxes” ug kon dili mohatag sa ilang gusto, sunogon ang ilang kahimanan sama sa mga heavy equipment.

Dinhi sa Kabisay-an, baga pa kaayo ang mga rebelde sa Negros Island – sa Negros Occidental ug sa Negros Oriental, ug dinhi ning mga lugara sige ang pangatake sa mga rebeldeng komunista. Karong bag-o, si Supt. Arnel Arpon ug lima niya ka sakop sa Guihulngan Police Station gi-ambush sa Sitio Mandi-e, Barangay Magsaysay, Guihulngan City. Nanglimbawot ang akong balhibo pagkadungog nako ning balitaa kay sa unahan og gamay sa lugar diin gi-ambush si Konsehal Edison dela Rita, ug sa dihang miresponde, gisunod og ambush silang Arpon ug mga sakop, naka-estambay ko hapit usa ka adlaw tungod kay may amigo ko nianang lugara.

Si Presidente Duterte miingon nga iyang iapil ang mga NPA sa Martial Law sa Mindanao, gawas sa mga teroristang Muslim extremists sama sa Abu Sayyaf ug Bangsamoro Islamic Freedom Fighters. Nagtuo ko nga moawas ang kagubot sa Mindanao dinhi sa Kabisay-an. Busa, angayan nga ipaubos sa presidente og Martial Law ang mga rehiyon sa Kabisay-an aron mapugngan ang pag-awas sa kagubot sa Mindanao. Wala na’y laing kadaganan ang mga rebeldeng NPA ug mga teroristang Muslim, gawas sa pag-anhi dinhi sa Kabisay-an. Usa pa, anaa na nakapuwesto ang mga NPA sa Negros Island ug nagsige na og pangatake.

Didto sa kauluhan, nagsige usab ang pangatake sa mga rebelde ngadto sa mga tropa sa gobiyerno. Busa kuyaw usab nga mahurot ang tibuok Pilipinas pagpaubos sa Martial Law.

Daghan ang nahadlok nga mobalik ang “dark years” sa diktadoriyang Marcos ning Martial Law ni Duterte. Para nako, lahi ang Martial Law ni Duterte. Naprobahan nato kini sa Marawi nga wala’y mga sundalong miabuso sa ilang gahum. Usa pa, ang mga Pilipino aktibo kaayo sa Facebook nga hasta ang iro nga magbinuang masakpan.