Kabus ug milyonaryo

Makapahinuklog kaayo ang nahitabo didto sa Barangay Valladolid, Carcar City kagahapon sa buntag diin usa ka dismissed nga polis mipusil ug mipatay pag-unay sa iyang asawa ug sa duha niya ka gagmay’ng anak.        

Ambot og unsa’y nasulod sa utok ni Joel Lopez nga gipangpusil man tawon niya ang iyang pamilya gamit ang M16 Armalite rifle, ug dayon nag-unay usab siya sa pagpakamatay gamit gihapon ang sama nga armas.

Nangligdas silang upat sulod sa ilang panimalay sa wala pa mosilang ang adlaw kagahapon. Gituohan nga ang suliran kabahin sa pinansyal maoy nakapaaburido sa utok ni Lopez ug gipangpatay ang iyang pamilya.

Pagkaluoy g’yud tawon sa duha ka bata. Inosente g’yud tawon sila kaayo nga wala gayud magpaabot nga ingon niadto ang ilang dangatan sa kamot ra mismo sa ilang amahan nga gituohan nila nga muamoma kanila hangtud nga sila mohingkod.

Sigun sa mga report, ang asawa ni Joel nga si Jelyn, usa ka education graduate, apan tingali wala pa makapasar pagka magtutudlo mao nga nagtrabaho lang usa sa usa ka pawnshop. Apan gikataho nga gitaktak usab sa trabaho kaniadtong Sabado.

Tinuod, pait kaayo ug makapaaburido g’yud kon mag-atubang ka og problema nga maglambigit og pinansyal. Mao man bitaw nga kon may kuwarta ko, maglisod ko sa pagbalibad kon may manghangyo nga manghuwam, ilabi na kon ang rason mao ang pagpalit og bugas.

Makapatagam lang hinoon kay daghan sab sa mga maayo kaayo manghulam ug mopasalig nga mobayad sa itagal nila nga petsa, apan ma-amnesia na paglabay sa mga adlaw. Daghan ko og mga tawo nga nailhan nga duna niining mao nga batasan.

* * *

Buyno, kay naghisgot na man g’yud ta og kuwarta, ang pagtigum ingon man ang inantigo nga pagnegosyo mao g’yud ang makapalambo ug makapaadunahan sa usa ka tawo.

Gikakita nako ang akong kumpare kaniadtong Sabado sa gabii sa usa ka coffee shop, dili lang nako ilhon. Kaniadto, susama ra g’yud tawon ang among kahimtang, nga dunay sakyanan ug may duha ka motor.

Apan karon, pastilan, sulod lang sa kapin sa tulo ka tuig, nakabaton na siya og nindot kaayo nga negosyo ug ang iyang “properties” ingon man kuwarta sa bangko, miabot na og minilyon. Gikasubo ko nga dili usab nako ikabutyag kon unsa ang matang sa iyang negosyo aron dili siya mailhan.

Gidudahan gud siya nga druglord kay dali kaayo nadato, apan tinarong ang iyang negosyo. Gisaysayan g’yud ko niya giunsa niya pagpundar ang iyang katigayonan, ug

makaingon ko nga sayon, apan lisud. Magnegosyo g’yud.