EDITORYAL - Martial Law ni Duterte ug Marcos

Nakuha g’yud ni Duterte ang iyang gusto nga malugwayan ang Martial Law didto sa Mindanao bisan pa man kon adunay mga pagsupak sa pipila ka hut-ong sa katawhan. Ang Martial Law sa Mindanao opisyal unta nga napupos niadtong Sabado sa gabii, apan nalugwayan kini kutob sa Disyembre 31. Ang Martial Law subay sa balaod, kutob lang 60 ka adlaw, apan niining tungora ang Kongreso maoy gihatagan og gahum sa balaod nga makadesider kon hangtud kanus-a base sa rason ug pagpasabot gikan sa militar ug kapolisan.

Sa panahon ni Marcos, mas daghan ang dili gusto sa Martial Law apan karon mas daghan kaayong mga magbabalaod, local government units ug ang katawhan mismo pabor sa Martial Law extension. Wa’y gusto og martial law kon malinawon lang ang nasud, apan tingali gikinahanglan pa kini karon tungod sa nagpadayong gubot sa Mindanao.

Wala pa hingpit matapos ug makalingkawas ang Marawi City gikan sa mga kamot sa teroristang Maute-Abu Sayyaf–ISIS, samtang anaa lang sa kilid-kilid kining hulga sa laing grupo nga Bangsamoro Islamic Freedom Fighters (BIFF) ug ang mga komunistang New Peoples’ Army nga pulos dili gusto og kalinaw, dugangan pa sa mga sindikato sa ilegal nga drugas, mao nga ang paglugway sa martial law makatabang og dako pagsulbad niini.

Hangtud nga naa pa kining hulga sa mga terorista, mga rebelde ug ilegal nga drugas, kinahanglang suportahan sa katawhan ang gobiyerno aron mabati sa kasundalohan ug kapolisan nga may bendisyon ang ilang gibuhat. Apan unta, dili nila kalimtan ang pagsiguro nga dili maabuso sa ilang gibuhat ang mga inosenteng sibilyan. Dili lang pud unta pulos military action ang himuon, kondili, paspasan sa civilian government agencies ang pagtabang sa mga naipit sa kagubot ug lihukon ang mga imprastraktura ug uban pa nga para sa kalamboan. Dili kalikayan ang pagtandi sa Martial Law ni Duterte ug sa martial law sa diktadoryang Marcos. Ang tubag niini, magdepende ra sa katawhan.