Peace talks angay na nga ihunong

Husto ang gibuhat sa kagamhanan pagkanselar sa panagsabot alang sa kalinaw uban sa mga komunista’ng rebelde. Wala na’y hinungdan kon magsige pa og negosasyon ang Duterte administrasyon kanila kon sige usab sila og pagpangatake sa puwersa sa gobiyerno.

Ang desisyon ni Presidente Duterte naggumikan sa pag-ambush sa New People’s Army sa convoy sa Presidential Security Group didto sa Mindanao dili pa lang dugay diin mikalas og usa ka kinabuhi sa habig sa puwersa sa gobiyerno.

Pipila ka adlaw human sa maong insidente, lain na usab nga pagpangatake sa mga sakop sa NPA ang nahitabo. Niining tungora didto sa dakbayan sa Guihulngan sa lalawigan sa Negros Oriental nanghasi ang mga rebelde.

Sa maong insidente, pito ang patay, lakip na ang unom ka sakop sa kapolisan, sa dihang gibanhigan sila sa mga rebelde samtang padulong miresponde sa taho nga adunay konsehal sa maong siyudad nga giatake sa mga armadong tawo.

Dili gayud kasaligan kining mga rebelde. Samtang relihiyoso ang kagamhanan sa lakang niini nga makatagamtam na gayud og kalinaw ang nasud, ania usab kining maong grupo nga dili gayud motamod og kasabotan. Mao na nga mas maayo pa nga putlon na lang kining mga peace talks.

Ang problema man  gud niining mga komunista nga rebelde mao nga klaro nga wala’y kontrol ang ilang liderato sa mga sakop niini. Mura’g kulang si Jose Maria Sison ug ubang opisyal sa gahum pagpitol sa ilang mga sakop nga nakalapas sa lagda sa unsa’y gikasabotan tali sa gobiyerno.

Tungod niini, nawala na ang akong bilib ni Sison ug sa kinatibuk-an nga liderato sa mga komunista’ng rebelde. Klaro nga dili sila sinsero sa pagpakigsabot sa gobiyerno. Usik lang ang higayon nga gigahin sa kagamhanan alang unta sa tinud-anay nga kalinaw sa nasud.

Alang kanako, dulom na nga makab-ot pa ang kalinaw uban sa mga rebelde. Ug panahon na  nga dili na gayud magpadala pa sa laang ang kagamhanan. Angay nga dili na kini magpanuko pagtugbang usab og puwersa batok niining puwerhisyo nga NPA.