Wa’y arang ni Duterte
Samtang nagsuwat ko niini, nagpadayon ang hinugpong nga tigum sa mga senador ug mga kongresista pagtuki sa awhag ni Presidente Rodrigo Duterte paglugway sa martial law sa Mindanao hangtud sa katapusan ning tuiga. Sama sa gipaabot, niulbo dayon ang lalis sa mga lagda kon unsaon pagpahigayon ang husay.
Akong naabtan si Kongresista Edcel Lagman nga nilampos pagkumbinser sa liderato sa duha ka balay balaoranan nga hatagan siya og higayon pagpasabot sa iyang mosyon nga pabarugon ang mga kongresista pagpasabot sa ilang baruganan, pabor o supak sa paglugway sa martial law.
* * *
Apan nalubong dayon ang sugyot ni Lagman sa makabungog nga mayoriya sa mga kongresista nga dili lang ganahang modason sa presidente, apan gusto sab nga mahuman dayon ang hinugpong nga sesyon. Kay gawas nga nakaputol kini sa ilang bakasyon, nakapamubo pa g’yud sa ilang pangandam sa State of the Nation Address (SONA) ni Duterte.
Nga mao na’y gipaabot nga sangpotanan, bisan sa wa pa mapahigayon ang hinugpong nga sesyon. Maisip na gani nga kadaogan sa mga kaatbang sa administrasyon ang pagsugot sa mga alyado sa administrasyon sa hinugpong nga sesyon, nga kusganon nilang gihikaw atol sa pagtuki sa orihinal nga proklamasyon sa martial law niadtong Mayo 23.
* * *
Bisan ang awhag sa pipila ka senador nga buwagon ang botasyon sa duha ka balay balaoranan, nameligro nga malampornas, kay sama nga dili malalis ang mayoriya sa administrasyon sa Senado ug sa House of Representatives, dili sab ikalimod ang kataas sa popularidad ni Duterte ug sa iyang pagdeklarar sa martial law ug pagsuspenso sa pribilihiyo sa Writ of Habeas Corpus sa Mindanao.
Gani, mahimo ra g’yud nga palapdan nila ang martial law sa tibuok Pilipinas ug sundon ang awhag ni House Speaker Pantaleon Alvarez nga lugwayan kini hangtud sa 2022.
* * *
Ang talagsaong popularidad ni Duterte ug ang kadako sa tentasyon sa pag-abuso niini, makapahinumdom nato sa pagsulbong sab sa popularidad ni US President Franklin Delano Roosevelt pag-asumir niya sa White House sa 1933.
Gipaluyohan si Roosevelt sa mga Amerikanhon bisan unsang radikal nga kausaban nga iyang gipasiugdahan, nga ang bantogang magsisibya ug maglilindog nga si Will Rogers nakaingon: “Bisan sunugon pa niyang Capitol, mamakpak ang mga tawo ug mopasidungog niya sa pagsugod sa kayo.”
* * *
- Latest