Pagluom ug pagtak-om
Makahinumdom ka pa ba sa mga higayon nga may ganahan unta ka nga itampo sa mga klase sa eskuylahan, o sa mga kulukabildo sa mga tapuktapok, o sa mga tigum sa mga buhatan ug kahugpongan? Apan gipaak ang imong dila kay naglisod ka pagbalay-balay sa imong igsusulti sa Iningles o Tinagalog?
Ambot kapila na mabitik ang atong mga kahigwaos sa pagpabuhagay sa siyagit sa atong kasingkasing ug hunahuna tungod sa kalisod sa paglitok sa langyaw’ng dila. Ambot kapila na ta maamang tungod sa kabalaka nga kataw-an o masawayan sa magkatuiris nga Iningles o Tinagalog.
* * *
Mahimo hinuon nga ang pagtak-om nakaluwas nato gikan sa wala kinahanglana nga lalis o sa pagkabisto sa dinalidali o dili maayo nga pagkatimbang-timbang nga mga ideya ug sa taphaw nga pagtan-aw sa hisgutanan tungod sa kakuwang sa kasayuran.
Apan mas dagko ang kapildehan sa mga ideya nga wala mapadayag ug wala mahatagi og tukmang bayhon aron nga maapil sa pag-umol sa mas malukpanon nga kauyonan sa nagkalainlain nga baruganan. Gawas pa, sa matinud-anon nga pagtuki wa’y sayop nga ideya.
Kay ang gawasnon nga panagpingki sa nagkasungi nga mga panghunahuna maoy mopasulbong sa mas undanon nga mga panglantaw.
* * *
Sa ato pa, ang pagpili natong mga Bisaya sa pagpakahilom tungod lang sa kalisod sa paggamit sa atong dila:
Wa lang makahikaw nato sa bililhon nga kahigayonan sa pagsalmot sa mas dakong wanang paglingi sa atong kagahapon, pagsuhid sa atong karon ug paglantaw sa umaabot; kon dili;
Nakahimo sab sa nasud ug kalibutan nga mas haw-ang kay wa makatampo ang mga dila nga, sama sa ato, nawad-an sa ilang makiangayong luna.
* * *
Mas makapasubo nga kasagaran nato wa kaamgo unsa kabililhon ang kabilin nga nawala tungod sa atong kaikog nga mag-Binisaya. Ug unsa kadako sa hulga nga mapuo ang atong pinulongan kon dili nato alimahan ug palambuon.
Samtang angay kita nga mauwaw kon mamalikas ug magpataka na lang og panghudlat si Presidente Rodrigo Duterte sa iyang mga pakigpulong, dili g’yud kita angay’ng manlipaghong kon mag-Binisaya na, dili lang sa iyang State of the Nation Address (SONA) karong Lunes, kondili, sa uban pa niya nga mahinungdanong mga mensahe.
Sa katapusan, may Bisaya na g’yud nga nag-Binisaya sa Malakanyang.
* * *
- Latest
