Kaduha nagpakasal, mahimong ikiha

Dear Atty. Divine,

Naminyo ko niadtong 2013 ug aduna mi usa ka anak. Usa ka OFW ang akong bana ug panagsa ra mouli. Ang akong anak nagdako g’yud nga wa kaayo makaila sa iyang amahan kay kon mouli ang akong bana, mo-stay lang siya kadali sa amoa unya molarga dayon siya sa Manila kay mag-follow-up kuno siya sa iyang papers.

Tungod niini, may mitambag nako nga panid-an ang akong bana kay basin og duna siya’y laing pamilya, hinungdan nga ako siya nga gikuhaan og Cenomar, ug didto akong nahibaw-an nga sa wa pa diay mi gikasal, minyo na diay siya daan ug ang iyang unang pamilya tua sa Manila.

Nahugno g’yud ko pagkasayod nako sa kamatuoran ug tungod niini, nagplano ko nga makigbuwag na kaniya. Unsa’y una nakong buhaton? Duna ba’y tulubagon ang akong bana sa iyang pagpakasal og kaduha? — Lucelle

Dear Lucelle,

Ang una nimong buhaton mao ang pagpakig- estorya sa imong bana labot sa imong nadiskobrehan. Imo sab nga i-discuss kaniya ang kalabot sa iyang suporta sa inyong anak aron regular g’yud siya nga mopadala niini.

Kon gusto ka nga makigbuwag kaniya mahimo nga imong ipa-annul sa korte ang inyong kaminyuon kay kini bigamous marriage man ug base sa balaod kon ang usa ka tawo magpakasal sa ikaduhang higayon, bisan kon nag-exist pa ang iyang unang marriage, ang ikaduhang marriage nga iyang gisudlan makonsiderar nga void.

Apan dili kini automatic kay kinahanglan g’yud nimo kini nga i-file sa korte. Usa sab ka kalapasan sa balaod ang gihimo sa imong bana ug mahimo siya nga mapasakaan og kasong Bigamy tungod sa iyang pagpakasal pag-usab bisan kon nag-exist pa ang iyang unang kaminyuon. —Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.