EDITORYAL - BRT o LRT?

Init kaayo ang isyu bahin sa modernong transportasyon dinhi sa Metro Cebu, ilabi na sa Bus Rapid Transport (BRT) system ug ang Light Rail Transit (LRT) tungod sa managlahi nga panan-aw sa mga opisyal. Dinhi sa Sugbo, gagmay ang mga karsada ug dug-ol ra kaayo ang mga eskina, apan ang BRT mahimo gihapon nga mapangitaan og paagi pinaagi sa engineering ug sa Local Government Unit (LGU).

Sa engineering, mahimo ra nga ang mga desinyo sa karsada, sa bus ug uban pa, ipahaum sa gikinahanglan aron mahimo nga epektibo ang BRT. Sama sa LRT, ang engineering dako gihapon og papel aron kini mahimo nga epektibo. Ang pagdesinyo kinahanglang ipahaom g’yud pagsulad sa problema sa trapiko nga maoy hinungdan ngano nga nagkinahanglan ang siyudad sa mao nga mga proyekto.

Apan kining tanan kahatagan lang og katumanan kon ang mga lider sa kagamhanan magkahiusa ug dili maglalis o magpataasay sa ilang garbo tungod sa ilang mga personal nga interes. Wa’y kapuslanan kining maong mga proyekto kon sa pagpili pa lang unsa’y angayang ipatuman, lalisan ug awayan na sa mga opisyal, ilabi na og ang pagsupak gihimo lang tungod sa pagpamolitika.

Tulin ang pag-irog sa mga adlaw ug nagkadaghan ang mga sakyanan, apan hinay ang paghimo og mga proyekto, sama sa pagmugna og dugang karsada ingon man ang pagpalapad sa gagmay’ng mga dalan. Mas nindot g’yud unta nga palapdan usa sa kagamhanan ang mga hagip-ot nga karsada nga anha magsubay ang rota sa BRT, sa dili pa hingpit nga ipatuman ang maong proyekto.

Mahimong paspas na unya ang biyahe sa mga mosakay sa BRT gikan sa Talamban paingon sa Bulacao, apan sigurado usab nga dakong sakripisyo ang sagubangon sa mga sumasakay sa ordinaryong sakyanan kon dili palapdan ang karsada nga agian sa rota sa BRT.