Brgy Bankal, Lapu-Lapu City

“Puwerte na man gyud nga sabaa sa videokehan diri Sitio Ticgahon kay bisa’g kadlawon na, sige pa man sila’g kanta. Wala man g’yud ni sila badlonga sa mga opisyal namo sa barangay bisa’g nakahasol sila sa ubang tawo.”

Brgy Vito, Balamban, Cebu

“Nasuroy ko niining lugara, pwerteng gubaa sa karsada nga maglisod og agi ang mga sakyanan. Naluoy ko sa usa ka maestra kay natuwad g’yud intawon ang gisakyan nga motor kay naglisud og agi tungod sa lapok.”

Brgy Talamban, Cebu City

“Kini ba nga mga dispatcher dapit sa Tintay kay abusado kaayo. Naay usa diha nga namaligya sab og shabu sa ubang mga driver ug konduktor sa jeep. Manghinaot lang gyud ko nga madakpan dayon kining maong dispatcher nga pusher.

Brgy Banilad, Mandaue City

“Kining sa Sitio Orel kilid niining grahean sa taxi kay naa man gihapo’y sige og labay og mga basura bisa’g naay gibutang nga karatola nga gidili ang paglabay. Manghinaot ko nga mahatagan kini og pagtagad kay magkatag lang pirmi ang basura.”

Brgy pooc, sta. Fe, cebu

“May konsehal sa usa ka barangay sa Medellin nga miari diri sa among lugar sa isla nga nanghagis, nagdaladala og pusil dapit sa Sugar beach. Usahay magpasalba pa g’yud. Manghinaot kami nga mapitol kining klaseha sa konsehal kay abusado kaayo.”

Brgy T. Padilla, cebu city

“Wala pa man gihapon hiposa ang mga sinako nga basura nga naa sa Sitio Indian likud nga bahin sa public market. Bisa’g hinay nga ulan mobaha dayon ang among lugar kay maalihan ra man sa mga basura nga wala mahipos.”

Brgy Marigondon, Lapu-Lapu City

“Naay retired nga air force nga magsige’g dala-dala og armas unya kon makainom kay manion dayon. Kuyawan intawon kami nga mga nanimuyo diri kay basin kon mamusil ni kay hambugero man kaayo.”

Brgy Malolos, Barili, Cebu

“Amo lang ireklamo ang usa ka piggery diri sa among barangay kay grabe na g’yud kabaho. Gipasirad-an na man unta ni, pero nagsige man gihapon pagpamuhi’g baboy tungod kay ang kapitan wala magpakabana.”

Brgy Punta Princesa, Cebu City

“Kining mga Sitio sa Arca, Enriquez ug Tuburan daghan man gihapon ang namaligya’g shabu, wala man mahurot paghipos. Unta aksyonan na kini sa mga polis.

Brgy Das (Lutopan), Toledo City

“Kining among sityo sa QMWMAA kay ari man diri ang hazing sa mga sakop sa AKRHO, labi na kanang karaan nga simbahan sa Mormons. Saba kaayo kini sila panahon sa kagabhion pero wala’y nagpakabana nga opisyal namo sa barangay.”

* * *

Alang sa inyong mga reklamo text lang sa 09083006702