Luya ug hinay nga intelligence

Sumpay ni sa miagi. Ang atake sa Marawi dugay nga gipangandaman sa Maute sigun sa mga footage ug hulagway nga nakit-an sa mga dapit nga nakuha pagbalik sa mga sundalo ug kapolisan.

Sa footage ug hulagway nga nakuha, makita nga gibalik-balikan ug gihimoan og mapa sa Maute ang mga dapit nga ilang atakehon ug ilang tagoan. Sa laktud, ang planong pag-atake wala lang himoa sa Maute sulod sa usa ka adlaw o gabii.

Ang planado nga pag-atake, gipamatud-an sa kalangay sa kasundalohan ug kapolisan sa pagpuhag sa nahisgutang grupo bisan og gigamit na sa gobiyerno ang tanan niining puwersa militar. Bisan pabor ang gobiyerno tungod sa puwersa niini sa kawanangan nga nagsige og tagak og bomba sa mga dapit nga gitagoan sa Maute, wala gihapon sila mapilde.

Ang mga yuta nga gilungagan sa Maute aron maoy mahimo nilang tagoanan laing kamatuoran sa ka preparado sa ilang pag-atake. Usbon nako wala kini nila mahimo sulod sa usa ka adlaw ug usa lang ka gabii.

Ang atake sa Marawi nahimo sa teroristang Maute tungod sa kaluya ug kahinay sa intelligence network sa atong kasundalohan ug kapolisan. Ang atake sa Marawi laing kamatuoran nga ang atong gobiyerno wala makakat-on sa iyang mga kasinatian ug dili gayud makahatag og kasiguroan sa kinabuhi ug butang sa iyang katawhan.

Ang Zamboanga siege nga gipangulohan ni Nur Misuari nga wala mabantayi sa militar ug kapolisan nga mikalas og 200 kapin ka kinabuhi, ug miguba sa minilyon ka pesos nga kantidad sa mga butang, igo na unta kadto nga makapahigmata sa gobiyerno sa pagpalig-on sa iyang pagpaniid sa kalihukan sa mga dautan, apan wala nila himoa.

Ang Zamboanga siege ug atake sa Marawi duha ka dagkong kamatuoran sa kahinay ug kaluya sa intelligence gathering sa militar ug kapolisan. Ambot ngano ug unsa’y hinungdan. Dili ba kaha tungod kay ang ilang mata tua na lang nakatutok sa kalihukan sa mga nalambigit sa gidiling drugas?