Nakalimot nga missing
Usa ka oras human nagpahibawo si Bohol Provincial Board Member Niño Rey Boniel sa presinto sa kapolisan sa Bien Unido nga missing ang iyang asawa niadtong Hunyo 7, gidapit siya sa mga opisyal sa Bohol Provincial Police Office (BPPO) pag-adto sa ilang headquarters sa Kampo Dagohoy sa Tagbilaran City.
Wa’y kasayuran nga gihatag si Boniel, ni ang mga polis sa Bien Unido, unsa’y nahitabo gikan sa alas-3 sa hapon kanus-a nagpa-blotter si Boniel hangtod sa alas-4 sa hapon kanus-a niabot sa iyang pinuy-anan sa Poblacion sa Bien Unido si Senior Inspector Jojie Mananquil, hepe sa BPPO Intelligence Branch.
* * *
Igo ra ba nga nagpahibawo si Boniel sa mga polis sa Bien Unido? O gipadangat sab niyang alarma ngadto sa BPPO? O sa Police Regional Office (PRO 7)? O sa Kampo Crame g’yud? Tay’m pa, nagpa-blotter ba siya kay nabalaka nga wala na igkita ang iyang asawa? O may lain siya nga tumong?
Sa pikas nga bahin, unsa man sa’y gihimo sa mga polis sa Bien Unido? Gialam-alaman ba si Boniel nga magpaabot una og 24 oras kay tingali og may gilakaw lang ang asawa? O gipayaka lang ang blotter hinikalimtan nga mayor sa Bien Unido ang gi-alarma nga missing?
* * *
Kon basahon ang petisyon ni Boniel sa habeas corpus sa Regional Trial Court sa Talibon sa Hunyo 8, hasta siya nakalimot nga missing ang iyang asawa. Wa gani kahunahuna nga posibleng nahilambigit sa kaso sa iyang asawa ang pagpatawag ni BPPO Chief, Senior Superintendent Felipe Natividad, niya.
Matud ni Boniel, dili ni niya mapanghimakak kay nasuwat sa iyang petisyon, nga boluntaryo siyang nikuyog ni Mananquil tungod sa pagtuo nga tukion nilang Natividad ang seguridad sa Bohol kay sakop man siya sa Bohol Provincial Peace and Order Council.
* * *
Unsang klaseha sa pagkabana si Boniel? Usa ka oras human nagpa-blotter nga missing ang iyang asawa, dihang nakahigayon pagpakigsulti sa hepe sa BPPO, nga klarong mas makatabang pagpangita sa iyang asawa, ang seguridad sa Bohol man hinuon ang nisantop sa iyang hunahuna?
Tungod ba kay tinuod ang pangangkon sa higala sa iyang asawa nga lima ka buwan na silang buwag? Kon mao, nganong kalit man lang nagpakabana hain na ang iyang asawa?
* * *
- Latest
