EDITORYAL - Wala’y pasaylo para sa Maute

Gusto na nga makigsabutsabot sa kagamhanan ang Maute Group, ug andam kuno nilang buhian ang ilang mga “hostages” bugti sa paghunong sa kapolisan ug militar sa paggukod ug pag-atake kanila.

Klaro kaayo nga nakabatyag na ang mga Maute nga anam-anam na sila nga naapike sa mga tropa sa kagamhanan mao nga gusto na sila nga makignegosasyon aron dili sila mahurot og pagkamatay.

Kinahanglan g’yud nga dili masayop si Presidente Duterte sa iyang lakang kabahin niini. Angay gyud niya nga isalikway ang gisugyot sa Maute Group nga makigsabot sila sa kagamhanan karon nga naapike na sila.

Ang usa sa mga lider sa Maute Group nga si Abdulah Maute mipadayag og kaandam nga buhian nila ang ilang mga bihag, apil na ang usa ka pari, bugti usab sa kagawasan sa founder sa ilang grupo nga si Cayamora Maute nga nadakpan sa mga tropa sa kagamhanan uban sa iyang ikaduha nga asawa.

Bentaha na lang kay ang Presidential Adviser on the Peace Process nga si Jesus Dureza dili pabor nga dawaton ang gisugyot sa Maute Group. Tingali si Dureza makatambag na ni Duterte nga dili maayo nga makigsabut-sabot ang kagamhanan sa mga Maute.

Daghan na nga nakalas sa kinabuhi sa mga tropa sa kagamhanan tungod sa nagpadayong gubat batok sa mga Maute. Dako na kaayo ang kadaot nga namugna tungod sa maong gubat. Karon nga naapike na ang mga Maute, angay na g’yud sila nga todason.

Gani, bisan ang mga kadugo nila nga Muslim naghambin na usab og kaso sa mga Maute kay tungod kanila, nahimong gubot ang ilang kinabuhi. Kinahanglan g’yud nga ang mga Muslim nga mahigugmaon sa kahusay ug kalinaw, maghiusa aron kombatihon kining grupo sa mga terorista.