Ligo nga wa’y tubig
Kanihit sa tubig. Kakandingon. Kamausisahon. Google. Wikipedia.
Mao na ang talagsaong kumbinasyon nga nisangpot sa pagkamugna sa alternatibo sa naandan natong pagkaligo nga mogamit og tubig. Kon maghinubra, mosangpot sa kausik sa tubig. Kon magkuwang, o kon hugaw ang tubig, mosangpot sa sakit ug kamatayon.
Nagbuwad sa init ang mga batan-on sa ilang pinuy-anan sa Limpopo, South Africa diha nga nangandoy ang usa nila nga makakaligo nga wa’y tubig. Mao ni nakaaghat sa 17-anyos nga si Ludwick Marishane sa pagdangop sa internet pagpangita og tubag sa pangandoy sa iyang higala.
* * *
Kay wala may laptop, sa mobile phone ra nahimo ni Marishane ang makuti niyang pagtuon sa tanang matang sa sabon, lotion ug moisturizer ug unsa’y ilang kapuslanan.
Gikan sa mga sagol sa kemikal, mga tanom ug prutas, nakamugna og iyang kaugalingon nga gel nga makapuli sa tubig ug sabon sa pagkaligo.
Ang ka wala’y puhonan, wala makababag sa iyang determinasyon. Ginamit ang iyang mobile phone, naghimo si Marishane og 40 ka pahina nga business plan ug gisumiter sa tanang panagtigi sa bag-ong mga negosyo sa South Africa.
Ginamit ang tanang nadaog nga premyo’ng kuwarta, gilusad ang iyang produkto: DryBath Gel.
* * *
Human sa 10 ka tuig, si Marishane nakatukod na og iyang kaugalingong kompaniya, ang Headboy Industries Inc. nga, gawas sa DryBath Gel, nagmugna na sab og ubang mapuslanong mga produkto.
May lain siya nga problema: Unsaon paglaslas sa presyo sa DryBath Gel aron nga maabot sa labing kabus nga mga molupyo sa mga dapit nga nihit ang tubig, nga maoy tinuod niyang gipahinungdan sa produkto?
Iyang sulbad: Patas-an ang presyo alang sa adunahang mga konsumidor aron ma-subsidize ang presyo sa kinabag-an.
* * *
Masaligon siya nga mobayad sa mas taas nga presyo ang hotels nga kabahin sa kampanya pagdaginot sa tubig, mga kompaniya sa ayroplano nga tag-as og flights ug mga atleta.
Sa pagsusi sa ilang website (headboy.org), akong nahibaw-an nga nagsugod na sila og pamaligya sa DryBath Gel Premium sa nagkalainlaing kanasuran sa kalibutan apil na sa Pilipinas. Wala pa hinuon sila’y mga tindahan. Busa maka-order lang online. Ilang presyo? P2,232.90 matag kahon nga may pito ka sachet. O P319 matag kaligo.
* * *
- Latest
