EDITORYAL - Uwat sa Gubat

Hapit na mahuman ang engkwentro sa Marawi City tali sa Maute-ISIS ug sa mga tropa sa kagamhanan karong nagkagamay na ang lugar nga kontrolado sa mga terorista. Kapin na sa 300 ka kinabuhi ang nakalas diin subra sa 280 niini mga gidudahang sakop ug supporters sa terorista.

Kinabuhi pa lang ang napokus karon nga danyos, ug mga katigayonan ug pinuy-anan nga tingali moabot na og bilyones ka pesos ang kantidad ang nangadaot. Apan ang epekto niini sa mentalidad sa mga naapektohan, dili kabayran og bilyones ka pesos, ug dili kini mapapas gikan sa ilang hunahuna sulod sa napulo ngadto 20 ka tuig.

Labaw nga dako kini og epekto sa kabataan nga direktang naigo sa krisis, tungod kay naguba ang ilang normal nga kinabuhi, lakip ang ilang pagtuon. Lisud alang sa mga ginikanan ug sa mga hamtong nga ipasabot sa kabataan ang nahitabo, busa dako og papel ang gobiyerno sa pagtabang kanila nga makalimtan kining tanan.

Manghinaot lang kita nga ang P20 bilyones nga pundo alang sa rehabilitasyon sa Marawi, makatabon gyud sa uwat sa gubat. Sama sa panultihon sa uban nga usahay maayo nga moagi og kalisud aron makat-on nga dili na kini masubli pa.

Sad-an ang mga terorista niini, apan mahimo usab nga basulon ang gobiyerno tungod sa ilang pagpasagad kaniadto sa nakalabay nga mga dekada. Apan sa kadugayan mahibaw-an ug masabtan ra sa kabataan samtang sila nagtubo, kon kinsa ang sayop ug nganong nahitabo kadto kanila.

Ang samad mugna sa bati nga kasinatian mas dugay maalim kon itandi sa pisikal nga samad. Undangon na usab unta ang pagsige og pasangil, ug paghimo’g mga kontrobersiya sa mga lider sa nasud nga may bulok politika kay mao kini ang hinungdan nganong naingon niini ang Mindanao.