Tagda g’yud dayon

Ang mga tagdumala sa lainlaing telecommunications companies, apil na ang Visayan Electric Company (VECO), angay’ng motagad dayon kon adunay ilang mga alambre nga nagbitay na diha sa karsada ug nakahatag og peligro.

Kini aron dili masubli kadtong hitabo didto sa Talisay kaniadtong Huwebes sa gabii nga nabitik ang liog sa usa ka tawo nga nagsakay og motorsiklo, ug hapit g’yud kini maputol diha nga mitugpa na ang iyang lawas sa karsada.

Apan ang pangutana, unsaon pagkasayod sa mga tagdumala sa mao nga public utility companies nga may alambre sila nga nagyunyon na diha sa karsada? Niining bahina, magkinahanglan na kita og pag-abag sa katawhan.

Kinahanglan nga ang mga tawo mopahibalo dayon ngadto sa mga hingtungdang kompaniya, aron kini maaksyonan dayon. Apan unsaon man nila pagkasayod nga ang maong alambre, iya sa PLDT, Globe Telecom o kaha unsa nga Cable service network?

Kon alambre sa kuryente mas sayon ra ang pag-ila kay VECO ra man g’yud maoy service provider dinhi sa Metro Cebu. Ang maayo tingali nga buhaton mao ang pagpahibalo sa mga opisyal sa barangay.

Unya, kamong mga opisyal sa barangay sa mga dapit nga nahimutangan sa mga nayunyon nga alambre, tagda usab dayon ninyo ang problema. Mentras nga wala pa moabot ang mga kawani sa hingtungdang public utility company, kamo usa ang moatiman aron nga dili kini makahatag og peligro.

Ingon niini ang maayo nga panerbisyo. Serbisyo man kaha ang inyong tuyo sa paglansar og pwesto sa barangay? Dili man kaha kay aron lang makakumkom og honorarium?

* * *

Uy, Domingo man g’yud karon, magpalain usa ta. Kamong mga tag-iya og iro, pahimusli ninyo ang tanyag sa Department of Veterinary Medicine pinaagi ni Cebu City Veterinarian Alice Utlang.

Libre ang pagpamakuna sa mga iro karong adlawa diha sa Plaza Independencia kay gisaulog karong adlawa nga Asong Pinoy Day. Ambot, ako nagplano usab gani unta nga dad-on nako ang akong mga iro. Lima ang akong mga iro, ug tinagad g’yud ni namo.

Libre ang pagrehistro sa mga iro karong adlawa diha sa Plaza Independencia, unya hatagan pa nila og libreng bakuna, unya hatagan pa g’yud og vitamins, apan kon mahurot na, wala na.

Pahimusli ninyo kining tanyag ni Dr. Utlang kay aron nga maatiman g’yud ang inyong mga iro. Abi ninyo, ang iro nga tinagad ninyo pag-ayo, mga buotan kaayo, sama sa akong mga iro.

Sige, magkita-kita ta ninyo sa Plaza Independencia.