Mga benepisyo sa honey (2)

Dili masayon ang pagprodyus og dugos, kuti ang proseso niini ug taas ang gikinahanglan nga panahon sa preparasyon ug ang pagsinabtanay sa nagkadaiyang tahas sa ilang trabaho, kun (teamwork). Matud sa mga eksperto sa ‘Honey’, ang usa ka libra sa dugos nga maprodyus, nagkinahanglan og 60 mil ka potyukan (bees), nga naniba sa milyones nga bulak, nga moabot hangtod sa 55 mil ka milya aron lang makakuha’g igong nectar.

Nasayod ba kita nga ang potyukan (bees), adunay duha ka tiyan? Ang usa sa pagkaon og paborito nila nga ‘pollens’, ug nga ang laing reserba nga tiyan, gamiton para sa pagsagol sa ‘enzymes’, aron isuka sa laing baba sa potyukan. Dayon mapundo kini sa tagoangkan (honeycomb) nga igawas sa tiyan ang ‘natural honey’.

Busa pahimuslan nato ang mga benepisyo niini nga gipaluyohan sa siyensya. Timan-an nato nga dili ni maayo ikunsumo sa mga masuso nga dili pa makasugakod kay gidebelop pa ang sistema sa imyun sa bata ug ang ‘digestions’. Ania ang pipila sa mga benepisyo sa dugos.

* Mopaalibyo sa ‘allergy’ – makaayo kini sa sintomas sa allergy, kay ang ‘Honey’ nagbaton og sustansya nga ‘anti-inflammatory’ nga nagsilbeng natural nga bakuna. Ang usa ka kutsarita kada adlaw nga pag-inom sa ‘Honey’, igo na nga depensa sa lawas batok sa allergy, nga sulod sa tulo ka bulan nga pagkonsumo niini, makapalig-on sa imyun sa allergy.

* Mopalahutay sa enerhiya – tungod sa iyang taas nga ‘carbohydrates’, ang katingalahan nga tinubdan sa enerhiya sa wala giproseso nga asukar. Ang ‘glucose’ ug ‘fructose’, moagi sa agianan sa dugo, paglahutay sa kusog nga gamiton aron kita makalihok nga dili dali kapuyon. Makatabang kini sa inadlaw nga kalihokan sa trabaho, ug sa aktibo nga mga gimbuhaton.