Sunod nga rebolusyon
Sa pipila ka pinuy-anan sa labing adunahang mga negosyante sa malambuong mga nasud sa kalibutan, magsultianay na ang ilang kabtangan:
Inig alarm sa ilang smart phone sa sayong buntag, mosiga ang suga ug mapawong ang aircon sa kuwarto, moandar ang coffee maker sa kusina ug motingog ang radyo o TV uban sa balita o musika.
Sa gitakdang oras human sa pamahaw, moandar ang sakyanan sa grahe, mapawong ang mga suga ug ubang kahimanan sa balay nga wa na gamita, moabli ang gate ug ini’g biya sa sakyanan, mokandado kini og balik dungan sa ubang pultahan kon wa na’y tawo sa balay.
* * *
Human sa smart homes, matukod sa dili madugay ang smart cities, diin ang mga sakyanan, gawas nga wa na’y drayber, makalikay na sa bara sa trapiko ug makadaginot og gasolina ug ang mga polis makadungog ug makatultol dayon sa mga buto sa armas ug mas paspas nga makapanalipod sa publiko.
Sa mga tambalanan, ang mga espesyalista maka-opera na sa mga pasyente nga nahimutang sa pikas nga bahin sa kalibutan ginamit ang real-time robotic tools, ug busa mahimo na nga mas paspas, mas sayon ug mas barato ang pagluwas og mga kinabuhi ug pag-ayo sa mga sakit.
* * *
May seryuso hinuon nga hulga sa paspas nga pagkatap sa Internet of Things (IoT): Ang kahakog sa pipila ka kompaniya nga nanag-iya sa bag-ong mga teknolohiya pagpakigsawo aron nga maangkon ang gawasnon nga technology standards sa tanang kahimanan, aron nga makaapil ang tanan sa nag-ung-ong nga technological revolution.
Maong karon pa lang, gipaningkamotan na nga gawasnong magkasulti ang chips ug sensors nga ipamutang sa refrigerators, TV sets, mga suga, gripo, kandado, sapatos, unlan, habol, katre, sinena ug ubang butang.
* * *
Palandonga ang kalibutan nga nihiyos na pag-ayo tungod sa world wide web, nga hingpit na gyud nga mabugkos sa IoT.
Gipanghinaot nga mosangpot sa mas makiangayon nga pag-apud-apod sa kalibutanong katigayonan ug makahatag og managsamang kahigayonan, hasta sa labing gagmay.
Ang paghimo nga gawasnon sa labing mahinungdanong teknolohiya sa IoT makapalambo sa tanan.
Ang bisan unsa nga pagsuway pag-monopoliya nila, makapasamot sa kadako sa haw-ang tali sa mga dagko ug mga gagmay, ug busa angay’ng pungilon na daan.
- Latest
