Kalainan sa annulment ug sa legal separation

Dear Atty. Divine,

Minyo ko ug wa pa mi anak sa akong bana. Apan aduna ko’y anak sa akong pagkadalaga. Ang akong anak didto nagdako sa iyang amahan, apan niadtong miaging tuig mihangyo ang amahan nga adto usa nako ang bata kay 5-anyos pa man kini, kay milarga siya sa abroad. So, gikuha nako ang bata apan nananghid ko sa akong bana ug misugot siya. Matag karon ug unya, manawag ang amahan sa bata kay mangumusta. Sus, kay magselos man ang akong bana ug mao kini hinungdan nga magsige mi og away. Aduna gani higayon nga iya ko nga gisagpa ug dili sab siya maayo og treatment sa akong anak. Dili na gyud ko kaagwanta sa iyang batasan atorni, ug gusto na gyud ko nga makigbuwag niya. Unsa may kaso nga akong i-file niya atorni, Legal Separation or Annulment? — Vicky

Dear Vicky,

Adunay dakong kalainan ang Annulment ug ang Legal Separation. Ang Annulment, kon ma-grant sa korte, pwede ka makaminyo pag-usab kay buot ipasabot niini gi-terminate sa korte ang inyong kaminyuon, busa libre na ikaw nga magpakasal og lain. Apan sa Legal Separation, bisan kon mauyunan kini sa korte, dili ka makaminyo pag-usab kay ang Legal Separation nagtugot lang kanimo ang korte  nga mopuyo ka separately sa imong bana, apan nagpabilin gihapon mo nga minyo sa usa’g usa. Lahi sab ang grounds sa Annulment kaysa Legal Separation. Apan sa dili ka pa mo-decide kon unsa’y imong i-file nga kaso, mas maayong imo usa nga estoryahon ang imong bana ug imo siya nga sultian labot sa iyang bati nga batasan ug imo siya nga warningan nga hayan imo siya nga buwagan kon dili kini niya usbon. Kon dili gyud gihapon siya mag-usab, then mo-decide ka apan kinahanglan nga duolon nimo ang imong abogado aron iyang ma-evaluate ang grounds sa kaso nga imong ipasaka, whether Annulment ba or Legal Separation. Thanks and God bless. -Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.